Ellikqalada bir kúnde úsh mektepke shekemgi bilimlendiriw shólkemi paydalanıwǵa tapsırıldı

Elimizde húrmetli Prezidentimiz tárepinen barlıq tarawlar qatarında bilimlendiriw tarawınada ayrıqsha itibar qaratılıp, bul baǵdarda keń kólemli reformalar ámelge asırılmaqta. Usı tiykarda balalardı mektepke shekemgi bilimlendiriwge qamtıp alıw jumıslarına ayrıqsha pát endirilip, eń alıs, shetki aymaqlarda da jańa baqshalar qurılıp atır. Usınday iygilikli jumıslardıń dawamı sıpatında Prezidentimizdiń 5246-sanlı qararı tiykarında Ellikqala rayonınıń «Paxtachi», «CHupon» mákan puqaralar jıyınlarında 36-hámde 37-mámleketlik mektepke shekemgi bilimlendiriw shólkemleri jańadan qurıldı. Sonday-aq, «Qılshınak» awıl puqaralar jıyınında «Sapargúl, Dilfuza, Shirinay» mektepke shekemgi bilimlendiriw shólkemi mámleketlik jeke sheriklik tiykarında shólkemlestirildi. Jańadan boy tiklegen bul imaratlar búgin saltanatlı túrde paydalanıwǵa tapsırıldı. Onda Qaraqalpaqstan Respublikası Joqarǵı Keńesiniń komitet baslıǵı M.Atamuratov shıǵıp sóylep, jańa imaratlardıń xalıq iygiligi jolında paydalanıwı múnásibeti menen jıynalǵanlardı qutlıqladı. Atap ótilgenindey, jańadan paydalanıwǵa tapsırılǵan mektepke shekemgi bilimlendiriw shólkemleri aymaq balalarınıń ozıq oylı, salamat hám elimiz rawajlanıwı jolında ayanbay xızmet etetuǵın nawqıran áwladlar bolıp jetilisip shıǵıwına xızmet etedi. Ilajda Ózbekstan Respublikası Qarjı hám Ekonomika ministrligi janındaǵı Awıllıq jerlerdi turaqlı rawajlandırıw joybarı boyınsha direktor orınbasarı R.Usmanov, Ministrler Keńesi Baslıǵınıń orınbasarı B.Otemuratov, rayon hákimi V.Niyazımbetovlar qatnastı.