Prezident pármanı tiykarında jaratılǵan imkaniyatlardan keń túrde paydalanıw máseleleri sóz etildi

Jaqında húrmetli Prezidentimizdiń Qaraqalpaqstan Respublikasın kompleks rawajlandırıw, isbilermenlikti qollap-quwatlaw hám xalıqtıń abadan turmısın támiyinlew baǵdarındaǵı jáne bir ayrıqsha áhmiyetli pármanı qabıl etilgen edi. Pármannıń mazmun-áhmiyetin xalqımızǵa keńnen túsindiriw hám isbilermenler arasında úgit-násiyatlaw maqsetinde búgin Taxtakópir rayonı hákimliginiń májilisler zalında ushırasıw ótkerildi. Onda Qaraqalpaqstan Respublikası Joqarǵı Keńesiniń sektor baslıǵı A.Shamuratov, Ministrler Keńesi janındaǵı Isbilermenlikke kómeklesiw direkciyası direktorı U.Xasanov, Ózbekstan Sawda-sanaat palatası Qaraqalpaqstan Respublikası basqarmasınıń baslıǵı K.Artıkov, rayon hákiminiń orınbasarları, máhálle jetiligi, fermerler hám isbilermenler qatnastı. Ushırasıwda Párman tiykarında isbilermenlikti jáne de qollap-quwatlaw, sanaat tarmaqları, awıl xojalıǵı, sociallıq hám óndirislik infrastrukturanı rawajlandırıw, sol tiykarda xalıqtıń bántligin támiyinlew boyınsha jaratılǵan imkaniyatlarǵa keńnen toqtap ótildi. Ilajda pikir-usınıslar tıńlanıp, ámelge asırılıwı tiyis jumıslar belgilep alındı.