«Máhálle sisteması xızmetkerleri kúni» múnásibeti menen bir topar taraw xızmetkerleri sıylıqlandı

Búgin Qaraqalpaqstan Respublikası Ministrler Keńesinde «Máhálle sisteması xızmetkerleri kúni» múnásibeti menen bir topar taraw xızmetkerlerin sıylıqlaw máresimi ótkerildi. Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı qutlıqladı. Atap ótiw orınlı, sońǵı jılları elimizde húrmetli Prezidentimiz basshılıǵında xalıqtıń turmıs tárizin jaqsılaw, járdemge mútáj shańaraqlardı qollap-quwatlaw, orınlardaǵı mashqalalardı unamlı sheshiw, máhálle institutın jetilistiriw boyınsha keń kólemli jumıslar ámelge asırılmaqta. Ótken qısqa dáwir ishinde tarawǵa baylanıslı bir qatar nızam hújjetleriniń qabıl etilgeni bul baǵdardaǵı ilajlar kólemin jańa basqıshlarǵa kóteriwge tiykar bolmaqta. Shın mánisinde xalqımız benen tıǵız islesetuǵın jámiyettiń bir buwını sıpatında máhálle institutı xızmetkerleri oǵada mashaqatlı, sonıń menen birge maqtanıshlı wazıypanı atqarıp kelmekte. Bunda máhállelerde awızbirshilik hám milliy qádriyatlarımızdı en jaydırıwda áhmiyetli bolǵan kóshe biyleri institutı xalıq penen tıǵız birge islesiwde «máhálle jetiligi»niń jaqın kómekshisine aylanǵan. Ótkerilgen ilaj dawamında búgingi sáne múnásibeti menen ózleriniń joqarı nátiyjeleri hám tabısları menen ajıralıp kiyatırǵan bir qatar taraw pidayıları Qaraqalpaqstan Respublikası Joqarǵı Keńesi hám Ózbekstan máhálleler awqamı tárepinen kókirek belgileri hám bahalı sawǵalar menen sıylıqlandı. Ilajda Ministrler Keńesiniń Baslıǵı F.Ermanov qatnastı.   Qaraqalpaqstan Respublikası Joqarǵı Keńesiniń Málimleme xızmeti