Aral mádeniyat sammitin joqarı dárejede ótkeriw haqqında

Aralboyı regionında qolaylı tábiyǵıy ortalıq jaratıw, aymaqtıń biybaha mádeniyatı hám tariyxıy miyrasın qásterlep saqlaw jáne keńnen ǵalaba en jaydırıw, usı baǵdarlarda ilimiy-izertlew jumısların, innovaciyalıq joybarlar hám dóretiwshilik baslamalardı ámelge asırıw ushın xalıqaralıq birge islesiw hám qarım-qatnastı bunnan bılay da keńeytiw maqsetinde Ózbekstan Respublikası Prezidentiniń qararı menen: 2025-jıldan baslap hár on segiz ayda - báhár yamasa gúz máwsimlerinde Aral mádeniyat sammiti (keyingi orınlarda - Sammit) ótkerip barıw jolǵa qoyıladı. Birinshi Aral mádeniyat sammiti Samarqand klimat forumı menen únles halda 2025-jıl 4-6-aprel kúnleri Samarqand hám Nókis qalalarında ótkeriledi. Aralboyında hám dúnyanıń basqa da regionlarında júzege kelgen ekologiyalıq mashqalalardı dodalaw hám aqılǵa uǵras sheshimlerdi usınıw ushın global platforma jaratıladı; Aralboyı mashqalaların sheshiwde pánleraralıq qatnas rawajlandırıladı; Turaqlı sheshimler hám strategiyalar jaratıwǵa qaratılǵan bilimlendiriw baǵdarlaması tiykarında Aral mektebi shólkemlestiriledi; Zamanagóy texnologiyalar hám dástúriy arxitektura tiykarında «Istiqlol» mádeniyat hám dem alıw baǵı, baǵ aymaǵında jaylasqan balalar kitapxanası qayta qurıladı hám olardan nátiyjeli paydalanıw jolǵa qoyıladı; Jetekshi jergilikli hám sırt el qánigeleri jáne shólkemler menen birgelikte Aralboyı regionında suw hám topıraq izertlewleri alıp barıladı; Aralboyı aymaǵınıń topıraq hám klimat sharayatına sáykes bolǵan awıl xojalıǵı eginlerin úyreniwge qánigelesken laboratoriyalıq platforma jaratıladı hám ol usı baǵdarda ámelge asırılatuǵın ilimiy izertlewlerdiń oqıw-ámeliy maydanına aylandırıladı; Aralboyı regionında ásirler dawamında qáliplesken biybaha mádeniyat hám dástúrlerdi saqlaw, qorǵaw hám keńnen ǵalaba en jaydırıw jumısları jedellestiriledi; Xalıqaralıq kólemde turaqlı sóylesiwler, ámeliyatlar, seminarlar, izertlew baǵdarlamaları shólkemlestiriledi.