Xalıqlarımız arasındaǵı doslıq hám awızbirshilik jırlandı

Búgin Nókis qalasındaǵı Doslıq kanalı boyında Xalıqlar doslıǵı bayramı ótkerildi. Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı elimizde elede keń túrde dawam etip atırǵan «Nawrız» áyyyamı, múbárek Ramazan haytı hámde búgingi awızbirishilik, doslıq bayramı menen qızǵın qutlıqladı. Atap ótiw orınlı,búgingi kúnde elimizde húrmetli Prezidentimizdiń basshılıǵında milletleraralıq tatıwlıqtı bekkemlewge, xalıqlar arasında óz-ara awızbirshilikti támiyinlewge, olar arasında keńpeyillik hám miyrim-shápáát ortalıǵın jáne de kúsheytiwge ayrıqsha itibar qaratılıp, bul baǵdarda keń kólemli ilajlar alıp barılmaqta. Búgin Tájikstannıń Xojend qalasında Ózbekstan, Qırǵızstan hám Tájikstan Prezidentleriniń qatnasıwında tariyxta birinshi márte 3 tárepleme sammit bolıp ótpekte. Álbette, bul sammit qońsılas mámleketler menen regionallıq birge islesiwdi bekkemlewde áhmiyetli qádem bolıp, Oraylıq Aziyada qáwipsizlik, turaqlılıq hám abadan turmıs tárizin támiyinlewge xızmet etedi. Sonı da ayrıqsha aytıw kerek, búgingi kúnde elimizde túrli millet hám elat wákilleri awızbirshilikli túrde jasap, elimizdiń rawajlanıwı jolında óziniń múnásip úlesin qosıp kelmekte. Ótkerilip atırǵan sammit penen únles ótkerilgen Doslıq bayramı mine usınday xalıqlar doslıǵın hám awızbirshilikti bunnan bılay da bekkemlewge xızmet etpekte hám bunday ilajlar elede dawam ettirileri sózsiz. Búgingi bayram saltanatında kórkem-óner hám mádeniyat xızmetkerleri atqarıwındaǵı xalıqlar doslıǵın jırlawshı koncert baǵdarlaması jıynalǵanlar názerine usınıldı. Qaraqalpaqstan Respublikası Joqarǵı Keńesiniń Málimleme xızmeti