Ózbekstan hám Yaponiya «jasıl» transformaciya processlerin ámelge asırıw boyınsha birge islesedi

Jaqında Ózbekstan Respublikası Bas ministriniń orınbasarı – ekonomika hám qarjı ministri Jamshid Qwchqorov Yaponiyanıń «Panasonic» korporaciyası ǴMDA boyınsha regionallıq direktorı Koji Terajima basshılıǵındaǵı delegaciya arasında ushırasıw bolıp ótti. Sóylesiw dawamında tárepler Ózbekstanda «jasıl» ekonomikanı rawajlandırıw boyınsha ámelge asırılıp atırǵan jumıslar hám keleshektegi rejeler boyınsha pikir alıstı. Sonday-aq, «jasıl» transformaciya processlerin qollap-quwatlaw hám zamanagóy joybarlardı engiziw máseleleri dodalandı. Ushırasıwda sociallıq obektler hám imaratlardı ısıtıwda «jasıl» energiya dáreklerinen paydalanıw máselesi dodalanıp, bul baǵdardaǵı imkaniyatlar úyrenildi. Sonday-aq, imaratlardıń energiya nátiyjeliligin arttırıw, tarawda jasıl texnologiyalardı engiziw, sonıń ishinde, ıssılıq nasosları hám energiya únemlewshi texnologiyalardan keńnen paydalanıw boyınsha usınıslar bildirildi. Ishimlik suwın únemlewshi hám tazalawshı zamanagóy texnologiyalardan nátiyjeli paydalanıw boyınsha da pikir alısıldı. Ministrliktiń málimleme xızmetine bola, “Panasonic Corporation” dúnyadaǵı jetekshi elektronika hám texnologiya kompaniyalarınan biri bolıp, tutınıwshı elektronika ónimleri, avtomobil komponentleri, sanaat sistemaları hám jasıl energiya sheshimlerin islep shıǵaradı. Kompaniya “Panasonic Green Impact” strategiyası sheńberinde uglerod neytrallıǵına erisiwdi maqset etip, ekologiyalıq taza texnologiyalardı rawajlandırıwǵa úlken itibar qaratpaqta. Soylesiwler juwmaǵında tárepler óz-ara paydalı birge islesiw qatnasıqların bekkemlew hám tarawdı jáne de rawajlandırıw boyınsha pikir alısıw processlerin keńeytiwge kelisip aldı.