Jeńimpaz sportshımız saltanatlı kútip alındı

Iordaniya mámleketiniń Amman qalasında sport gúresleri boyınsha Aziya chempionatı óz juwmaǵına jetti. Bul jarısta  Ózbekstan saylandı komandası quramında grek-rim gúresi boyınsha Jalǵasbay Berdimuratov, hayal-qızlar gúresi boyınsha Aqteńge Keunimjaeva, Sárbinaz Jiyenbaeva, Nabira Esenbaeva, Shaxzada Allaniyazova hám basqa da qaraqalpaqstanlı sportshılar da qatnastı. Solardıń arasınan -87 kg salmaqta Jalǵasbay Berdimuratov barlıq qarsılasların jeńip shıǵıp, ekinshi márte Aziya chempionı ataǵına miyasar boldı. Sonday-aq, bul jarıs 18 jastaǵı jas palwanımız Shaxzada Allaniyazova ushın da tabıslı keldi. Ol qola medalı ushın bellesiwde qubla koreyalı Bark Jeon Gaeni 5:1 esabında jeńip shıǵıwǵa eristi hám hayal-qızlar gúresi boyınsha saylandı komandamız ushın birden-bir medaldı alıp berdi. 31-mart kúni Nókis xalıqaralıq aeroportında jeńimpaz palwanımız Shaxzada Allaniyazova  Qaraqalpaqstan Respublikası Sport ministrligi jámááti, trener-ustazları, ata-anaları, sport jankúyerleri hám ǵalaba xabar quralları wákilleri tárepinen saltanatlı túrde kútip alındı. Máresimde Qaraqalpaqstan Respublikası Sport ministri Erkinbay Qutıbaev Shaxzada Allaniyazova hám onıń trenerlerin qolǵa kirgizgen tabısı menen qutlıqlap, olarǵa estelik sawǵaların tapsırdı.