Dzyudo boyınsha Ózbekstan kubogı jarıslarınıń ashılıw máresimi bolıp ótti
580
Búgin Nókis qalasındaǵı 1-sanlı sport mektebinde (Manej) sporttıń dzyudo túrinen jaslar arasında Ózbekstan kubogı jarıslarınıń ashılıw máresimi bolıp ótti. Ashılıw máresimine Qaraqalpaqstan Respublikası Joqarǵı Keńesi Baslıǵınıń orınbasarı R. Saparbaev hám Ózbekstan Respublikası dzyudo federaciyası baslıǵı Z.Kaxramanov qatnastı.
Onda Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev shıǵıp sóylep, barlıq qatnasıwshılardı jarıstıń ashılıwı múnásibeti menen qutlıqladı hám áwmet tiledi.
Atap ótilgenindey, sońǵı jılları elimizde húrmetli Prezidentimizdiń basshılıǵında dene tárbiya hám sporttı rawajlandırıwǵa, jaslardı sportqa keńnen qamtıp alıwǵa, Olimpiya hám milliy sport túrlerin rawajlandırıwǵa ayrıqsha itibar qaratılıp, bul baǵdarda keń kólemli ilajlar ámelge asırılıp atır. Ótkerilip atırǵan sport jarısları mine usı baǵdardaǵı jumıslardan biri esaplanadı. Bunnan soń kún dawamında ótkeriliwi belgilengen bellesiwler baslap jiberildi.


