Bozataw, Moynaq hám Qanlıkól rayonları hayal-qızları ushın isbilermenligin rawajlandırıwǵa grant qarjıları ajıratıladı
1054
Húrmetli Prezidentimizdiń «Xalıqaralıq tikleniw hám rawajlanıw banki hámde Xalıqaralıq rawajlanıw Awqamı qatnasıwında «Awıl isbilermenligin rawajlandırıw-2-Faza» joybarın ámelge asırıw is-ilajları haqqında»ǵı 317-sanlı qararına muwapıq 2025-2027 jıllar aralıǵında Ózbekstan Respublikasında jasawshı kem támiyinlengen, jumıssız hayal-qızlardıń xalıqaralıq tájiriybeli ekspertler tárepinen isbilermenlikke oqıtılıwı belgilep berilgen edi.
Búgingi kúnde joybar sheńberindegi jumıslar «Hayal-qızlar isbilermenligin rawajlandırıw» 1.4 subkompanenti Bolgariyanıń Isbilermenlik hám atqarıwdı rawajlandırıw Orayı (CEED Bulgaria) hám Tashkenttegi «Annexure» konsalting hám injiniring kompaniyası tárepinen ámelge asırılıp atırǵan bolıp, Bozataw rayonı hákimligi májilisler zalında joybar toparı hám bozatawlı hayal-qızlardıń ushırasıwı bolıp ótti.
Onda Sırtqı biyǵárez járdem qarjıların (grantlardı) tartıw hám donorlar menen islesiw bólimi baslıǵı K.Idirisov, Jáhán bankiniń Qaraqalpaqstandaǵı wákili X.Jumabaev, joybar baslıǵı I.Rudenko, rayon belsendileri hám hayal-qızlar qatnastı.
Ushırasıwda mámleketimizde sońǵı jılları shet el grantları hám donor shólkemlerin tartıw arqalı jergilikli xalıqtıń turmıs sharayatın jaqsılaw, olardıń mashqalaların sheshiw boyınsha keń kólemli jumıslar ámelge asırılıp atırǵanlıǵı atap ótildi.
Bunnan soń, Jáhán bankiniń Qaraqalpaqstandaǵı wákili X.Jumabaev, joybar baslıǵı I.Rudenkolar sózge shıǵıp, «Hayal-qızlar isbilermenligin rawajlandırıw» joybarı haqqında keń túrde túsinik berdi. Ilaj dawamında Joybar qatnasıwshılar ózlerin qızıqtırǵan sorawlarǵa juwaplar aldı.
Aytıp ótiw orınlı, Xalıqaralıq tikleniw hám rawajlanıw banki hámde Xalıqaralıq rawajlanıw Awqamı tárepinen qarjılandırılıp atırǵan joybar 2025-jıldıń fevral hám 2027-jıl avgust ayları aralıǵında dawam etip, Bozataw, Moynaq hám Qanlıkól rayonlarınan 1500 hayal-qızlar 5 modul tiykarında oqıtıladı hám sertifikat beriledi. Sonday-aq, joybar juwmaǵında hár bir qatnasıwshı xalıqaralıq ekspertler járdeminde grant joybarların jazıp, eń jaqsı jazılǵan grantlar 5 000 hám 15 000 AQSh dolları muǵdarında qarjılandırıladı. Bul qarjı olarǵa ózleriniń isbilermenligin rawajlandırıwǵa járdem beredi.




