Isbilermenlik hám kishi biznesti jáne de rawajlandırıw, olardı hár tárepleme qollap-kuwatlaw, puqaralardı isbilermenlikke tartıw boyınsha Qaraqalpaqstan Respublikası Joqarǵı Keńesiniń gúllán xalqımızǵa ÚNDEWI Xúrmetli watanlaslar! Búgingi kúnde erkin hám abat elimizdiń barlıq tarawlarında rawajlanıwlar júz berip, qala hám awıllarımız abadanlasıp, xalqımızdıń turmıs dárejesi hár qashanǵıdan da jaqsılanıp barmaqta. Álbette, kóz aldımızda júz berip atırǵan bunday ózgerisler menen jańalanıwlar usı elde jasap hám miynet etip atırǵan hár bir insanda milliy maqtanısh sezimlerin oyatadı. Ásirese, bıyılǵı jıl óziniń úlken dóretiwshilik jumısları, qolǵa kirgizilgen mol tabısları, jetiskenlikleri hám ullı maqsetleri menen ajıralıp, hár bir insandı elimizdiń bunnan bılay da rawajlanıwı, xalqımızdıń jáne de abadan turmısı jolındaǵı iygilikli islerge qaray ruwxlandırmaqta. Húrmetli Prezidentimiz tárepinen bıyılǵıń jıldıń «Jedel investiciyalar hám sociallıq rawajlanıw jılı» dep belgilep beriwi de elimizde isbilermenlikti jáne de rawajlandırıw, ásirese, sırt el investiciyaların keńnen tartıwǵa kóplegen múmkinshilikler jaratıw menen birge, sırt ellerdegi sherikler ushın barlıq qolaylıqlar jaratılıwına tiykar bolmaqta. Sonday-aq, xalıqtıń sociallıq turmıs tárizin jaqsılıw, olardı isbilermenlikke keńnen tartıw maqsetinde mámleketlik baǵdarlamalar qabıl etilip, xalıqqa jeńilletilgen kreditler berilmekte. Atap aytqanda, «Hár bir shańaraq – isbilermen» hám «Jaslar – keleshegimiz» baǵdarlamaları, sonday-aq, qıytaq jer iyelerin qollap-quwatlaw, ónermentshilikti rawajlandırıw, hayal-qızlardı qollap-quwatlaw hám de xalıqtıń bántligin támiyinlew qorları arqalı xalqımız arasında isbilermenlikti rawajlandırıw ushın jeńilletilgen kreditler ajıratılmaqta. Bulardıń barlıǵı hár bir puqaranıń óz aldına qoyǵan maqsetlerine qaray isenimli túrde umtılıwına, oylaǵan niyetlerine jetisiwine, xalqımızdı zaman menen teńdey qádem taslawına bekkem tiykar bolmaqta. Usılar menen bir qatarda, búgingi kúnde húkimetimiz tárepinen isbilermenlikti hár tárepleme qollap-quwatlawǵa, olarǵa barlıq qolaylıqlardı jaratıp beriwge, isbilermenlerdiń aldındaǵı hár qanday tosıqlardı alıp taslawǵa, olardıń jumıslarına nızamsız aralasıwdıń aldın alıwǵa qaratılǵan kóplegen arnawlı párman hám qararlardıń qabıl etiliwi xalqımız ushın úlken imkaniyatlar esigin ashıp bermekte. Bul óz gezeginde tábiyǵıy baylıqlarǵa tolı bolǵan úlkemiz resurslarınan aqılǵa muwapıq paydalanıw, barlıq aymaqlarda sanaat, óndiris, xızmet kórsetiw, awıl xojalıǵı hám basqa da tarawlarda isbilermenlikti keńnen en jaydırıw ilajların jańa basqıshlarǵa kóteriwge tiykar salmaqta. Usınıń nátiyjesinde xalqımızdıń barlıq qatlamınıń, ásirese, jaslardıń óz súygen kásibi menen shuǵıllanıwına, olardıń belgili jumıs orınları menen támiyinleniwine, hár bir shanaraqtıń turmıs dárejesiniń jaqsılanıwına erisilmekte. Búgingi kúnde isbilermenlerdi materiallıq qollap-quwatlaw baǵdarında olarǵa kommerciyalıq bankler tárepinen kóplegen jeńilletilgen kreditlerdiń beriliwi, mámleketlik múlklerdiń, bos turǵan imaratlardıń biypul ajıratılıwı, salıq tólemlerinen jeńilliklerdiń engiziliwi, aymaqlarda erkin ekonomikalıq zonalardıń shólkemlestiriliwi isbilermenlerge degen joqarı isenim hám ǵamxorlıqtıń ayqın mısalı bolıp tabıladı. Húrmetli Prezidentimizdiń xalıqshıl siyasatı nátiyjesinde kóplegen rawajlanǵan mámleketler menen investiciyalıq hám sawda-ekonomikalıq qatnasıqlardıń jolǵa qoyılıwı, sırtqı hám ishki bazarlardıń erkinlestiriliwi xalqımızdıń keń kólemde isbilermenlik penen shuǵıllanıwında, sırt el investiciyalarınıń tosıqlarsız alıp keliniwinde, import hám ónimler eksportınıń erkinlesiwinde ayrıqsha orın tutpaqta. Sonı maqtanısh penen atap ótiwimiz tiyis, búgingi kúnde elimizde isbilermenlik hám kishi biznesti rawajlandırıw baǵdarında kóplegen iygilikli isler ámelge asırılmaqta. Atap aytqanda, shańaraqlıq isbilermenlikti, isbilermen hayal-qızlardı, imkaniyatı sheklengen puqaralardı isbilermenlikke tartıw baǵdarında bir qansha jetiskenliklerge erisilmekte. Usınıń nátiyjesinde xalıqtıń bántligin támiyinlewde, olardıń sociallıq turmıs dárejesiniń jaqsılanıwında, sonıń menen birge, milliy ónimlerimiz kóleminiń artıwında, kishi sanaat hám óndiris sapasınıń joqarılawında, ishki bazarımızdıń sapalı ónimler menen támiyinleniwinde hám respublikamızdıń eksport potencialınıń artıwında bir qatar jetiskenlikler kózge taslanbaqta. Solay eken, hár birimiz bar múmkinshiliklerden nátiyjeli paydalanǵan halda isbilermenlik penen shuǵıllanıp, elimizdi sociallıq-ekonomikalıq rawajlandırıwǵa, óz shańaraǵımızdıń dáramatın arttırıp, onıń abadanlıǵın támiyinlewge, Watanımız hám shańaraǵımız aldındaǵı insanıylıq parızımızdı orınlawǵa belsene qatnasıwǵa shaqıramız. Sonı da umıtpawımız kerek, xalqımızǵa jaratılıp atırǵan bunday keń imkaniyatlarǵa is penen, jetiskenliklerimiz benen juwap qaytarıp, keleshegimizdiń isenimli tiykarın jaratıwda hár birimiz óz úlesimizdi qosıwımız, jańa áwladqa úlgili islerimiz benen órnek bolıwımız hám bunday iygilikli islerde óz ornımızǵa iye bolıwımız zárúr. Demek, búgingi tiykarǵı wazıypamızdan biri – bul hár birimiz óz aldımızǵa belgili bir maqset qoyıp, bar kúsh-ǵayratımızdı hám bilimimizdi iske salıp, berilgen imkaniyatlardan aqılǵa muwapıq hám óz waktında nátiyjeli paydalanıp, óz biznesimizdi, isbilermenlik háreketimizdi baslawımız kerek. Gúllán xalqımızdı, óz Watanına, shańaraǵına sadıq hár bir azamattı, hayal-qızlarımızdı, jaslarımızdı búgingi kúnniń biyminnet imkaniyatlarınan paydalanǵan halda tez pátler menen rawajlanıp atırǵan zaman talapları tiykarında alǵa umtılıp, isbilermenlik jumısların alıp barıwǵa shaqıramız! Qádirli zamanlaslar! Húkimetimiz tárepinen isbilermenlikti qollap-quwatlaw baǵdarında jaratılıp atırǵan imkaniyatlardan nátiyjeli paydalanıp, búgingi kúnde jumıs alıp barıp atırǵan barlıq isbilermenlerden kópshilikke órnek bolıp, watanlaslarımızǵa, óz jaqınlarımızǵa, jaslarımızǵa turmıslıq tájiriybelerden kelip shıǵıp keńesler beriwin, ustazlıq etiwin hám jol-joba kórsetiwin, ózleriniń alıp barıp atırǵan iygilikli islerin dawam ettirip, ele de joqarı jetiskenliklerge erisiwin soraymız! Sizlerdi jáne bir márte hár bir kúnnen hám imkaniyatlardan nátiyjeli paydalanıp, óz biznesińizdi baslap, onı jolǵa qoyıwǵa hesh ekilenbey qádem taslawǵa, huqıq hám erkinligińizden tolıq paydalanıwǵa, elimizdi jáne de rawajlandırıwǵa bar kúsh-ǵayratıńızdı jumsap, isbilermenlikti jolǵa qoyıwǵa shaqıramız!