Prezident «Moynaq akva sanaat» mámleketlik unitar kárxanasın barıp kórdi

Bir waqıtları Moynaq balıqshılıq sanaatı menen belgili bolǵan. Prezidentimiz SHavkat Mirziyoev ótken jılı usı jerge kelip, bar bolǵan suw basseynlerinde balıqshılıqtı qayta tiklew hám rawajlandırıw boyınsha usınıslar bergen edi. Bul haqqında Prezident baspasóz xızmetixabar berdi. «Moynaq avka sanaat» kárxanası – usı baslamanıń nátiyjesi. Joybarlıq bahası 20 milliard sumlıq usı kárxana jılına 4 mıń tonna balıqtı qayta islew quwatlılıǵına iye boladı. 200 tonna duzlanǵan balıq, 780 tonna farsh, 400 tonna file, 9 million dana konserva islep shıǵarıladı. Derlik 60 jumıs ornı jaratıladı. Házirgi waqıtta kárxana imaratı qurılısı juwmaqlanıp, texnologiyalıq úskeneler ornatılmaqta. Onı usı jıldıń sentyabr ayında iske túsiriw jobalastırılǵan. Usı jerde Qaraqalpaqstanda balıqshılıqtı rawajlandırıw boyınsha islenip atırǵan jumıslar haqqında maǵlıwmat berildi. Bul tarmaqqa qosımsha 17 joybar islep shıǵılǵan. Olar nátiyjesinde balıq jetistiriw kólemin 15 mıń tonnaǵa, qayta islew dárejesin 36 procentke jetkeriw jobalastırılǵan. Araldıń qurıǵan ultanına náller egiw máselesine de itibar qaratıldı. Qánigelerdiń málim etiwinshe, 42 jılda 400 mıń gektarlıq maydanǵa seksewiller egilgen bolsa, 2018-2019-jılı derlik 500 mıń gektarda qorǵaw toǵaylıqları payda etilgen. Toplanǵan tájiriybeden kelip shıǵıp, jáne eki jılda 700 mıń gektar jerdi jasıl aymaqqa aylandırıw múmkinligi atap ótildi.