Qaraqalpaqstan Respublikası Joqarǵı Keńesiniń Baslıǵı M.T.Erniyazovtıń Ǵárezsizligimizdiń 28 jıllıǵına baǵıshlanǵan saltanatlı máresimdegi qutlıqlaw sózi

Assalawma áleykum, Húrmetli miymanlar! Qádirli Watanlaslar! Eń dáslep, Sizlerdi Qaraqalpaqstan Respublikası Joqarǵı Keńesi hám Ministrler Keńesi atınan elimiz tariyxındaǵı qutlı sáne, erkin hám abadan turmıs jolındaǵı barlıq tabıslarımızdıń tiykarı bolǵan eń ullı hám eń áziz áyyyam – Ǵárezsizligimizdiń jigirma segiz jıllıq bayramı menen qızǵın qutlıqlap, bársheńizge bekkem densawlıq, shańaraqlarıńızǵa baxıt hám bereket, elimizdiń jáne de rawajlanıwı jolındaǵı barlıq iygilikli islerińizde tasqın tabıslar tilewge ruxsat etkeysizler! Áziz doslar! Bársheńizdiń xabarıńız bar, búgingi kúnde elimizde insan huqıqları menen nızamlı máplerin támiyinlew, jaslarımız benen hayal-qızlarımızdı, nuranıylarımız benen sociallıq járdemge mútáj insanlardı hár tárepleme qollap-quwatlaw, xalqımızdıń turmıs dárejesi hám sapasın jaqsılaw, isbilermenlikke keń jol ashıw ilajları pútkilley jańa basqıshlarǵa kóterilip barmaqta. Sonı maqtanısh penen atap ótiwimiz tiyis, búgingi kúnde Húrmetli Prezidentimizdiń basshılıǵında elimizdiń barlıq orınları sıyaqlı qala hám rayonlarımız jańasha shıray ashıp, úlken dóretiwshilik maydanına aylanıp barmaqta. Mine, usınıń nátiyjesinde birinshi yarım jıllıqta jalpı aymaqlıq ónimler kólemi 7 trillion swmdı quraǵan bolsa, jıl juwmaǵına deyin bul kórsetkish 15 trillion swmǵa jetiwi kútilmekte. Bunnan úsh-tórt jıl aldın jıllıq jalpı aymaqlıq ónimler kólemi 4 trillion swmdı ǵana quraytuǵın edi. Usılar qatarında, ótken altı ay dawamında qurılıs jumısları kólemi 45 payızǵa, investiciyalar kólemi 19,4 payızǵa, tutınıw tovarların islep shıǵarıw kólemi 8,4 payızǵa, awıl xojalıǵı ónimlerin jetistiriw kólemi 5,4 payızǵa, xızmetler kólemi 18 payızǵa óskeni – ekonomikamızdıń tez pátler menen rawajlanıp atırǵanın dálilleydi. Búgingi kúnde Húrmetli Prezidentimizdiń basshılıǵında Moynaq hám Qanlıkól rayonlarında, hátte, eń shetki awıllarımızda júrgizilip atırǵan qurılıs hám abadanlastırıw jumısları kewillerge quwanısh sezimlerin baǵıshlaydı. Qádirli Watanlaslar! Hámmeńiz jaqsı bilesizler,  gúllán xalqımız Húrmetli Prezidentimizdiń Qaraqalpaqstanǵa bolǵan hár bir saparın elimizge kelgen úlken baxıt, mol bereket hám sheksiz dáwlet sıpatında ayrıqsha quwanısh penen qarsı almaqta. Keshe ǵana, yaǵnıy, 20-21-avgust kúnleri Húrmetli Prezidentimizdiń Moynaq rayonında, sonday-aq, Nókis qalasında xalqımız benen bolıp ótken ushırasıwları – bul úlken tariyxıy waqıyalardı ózinde jámlewi menen birge, xalqımızdıń yadınan hesh qashan shıqpaytuǵın quwanıshlı máwritlerdi, rawajlanıwlardıń jańa basqıshların ózinde jámleydi. Ásirese, Húrmetli Elbasshımızdıń «Adamlar erteń emes, búgin jaqsı jasawı kerek», «Kimdur biziń reformalarımızǵa gúman etse, Moynaqqa kelip kórsin», «Jańalanıwlardı qaǵazda emes, adamlardıń kózlerinde kóriwimiz kerek», degen oǵada tereń mazmunlı pikirleri kewillerdi tolqınlandırıp, júreklerge ilham-yosh, bileklerge kúsh-ǵayrat inam etpekte. Álbette, ásirlerge tatıytuǵın keń kólemli iygilikli islerdi ámelge asırıwda Húrmetli Shavkat Miromonovich bárshemizge ibrat bolıw menen birge, gúllán xalqımızdı anıq maqsetler átirapına jámlestirip, olardı úlken dóretiwshilik islerine ruwxlandırmaqta. Bolıp ótken ushırasıwda Húrmetli Prezidentimiz Qaraqalpaqstandı rawajlandırıwda ayrıqsha áhmiyetke iye bolǵan 5 tiykarǵı wazıypanı belgilep berdi. Yaǵnıy, investiciyalardı keńnen tartqan halda sanaattı jedel rawajlandırıw, tarawlarda óndiris kárxanaların shólkemlestiriw, isbilermenlikke keń jol ashıw, olardı hár tárepleme qollap-quwatlaw, awıl xojalıǵına zamanagóy texnologiyalardı engiziw, zúráátlilikti arttırıw, óndiris kárxanaların iske qosıw hám xalqımız ushın zamanagóy infrastrukturanı jaratıw, Aralboyı xalqınıń jasaw sharayatların jaqsılaw wazıypaları belgilep berildi. Sonday-aq, xalqımızdıń ótinish-tileklerinen kelip shıǵıp, 2019-2022-jıllarda jámi 14 trillion 684 milliard swmlıq 697 joybardı ámelge asırıw, usınıń esabınan 14 mıńǵa jaqın jumıs orınların jaratıw wazıypaları belgilep alındı. Sonıń ishinde sırt el investiciyalarınıń úlesi 914 million 735 mıń AQSh dolların quramaqta. Xalqımız turmısında hám ekonomikamızda ayrıqsha orın iyeleytuǵın bul joybarlar haqqında sóz bolǵanda, álbette, Qıpshaq poselkası tusınan Ámiwdáryaǵa avtomobil hám temirjol kópirin qurıw, Nókis - Aqtaw jónelisi boyınsha avtobus hám temirjol qatnawın jolǵa qoyıw, “Nókis – Qońırat – Dawıt-ata” avtomobil jolınıń 240 kilometrlik bólegin rekonstrukciyalaw, Qaraózek hám Taxtakópir rayonları oraylarında “Abat oray” baǵdarlamasın ámelge asırıw reje qılınbaqta. Sonı da ayrıqsha atap ótiwimiz tiyis, búgingi kúnde Qaraózek rayonındaǵı “Tebinbulaq” káni negizinde kán-metallurgiya kompleksin qurıw joybarı baslanbaqta. Mine, usınday keń kólemli iygilikli islerdiń dawamın Nókis qalasında lak-boyaw ónimlerin islep shıǵarıw kárxanasın iske qosıw, 50-60 payız ǵálle maydanların qaramalshılıq, qusshılıq, balıqshılıq hám dán kárxanalarına klaster usılında biriktiriw, Germaniyanıń maman qánigeleri hám zamanagóy texnologiyaları tiykarında násilshilik hám sharwashılıq klasterlerin ashıw, “Dáryaaralıǵı” suw saqlaǵıshında jılına 20 mıń tonna balıq jetistiriw, noyabr – fevral aylarında Aral teńizi ultanında 700 mıń gektarǵa seksewil egiw jumıslarında kóriwimiz múmkin. Usılar menen bir qatarda, “Aralboyı regionı ushın Insan qáwipsizligi boyınsha kópsheriklik trast fondı”nıń qarjıları esabınan Moynaq rayonında Koreya texnologiyası tiykarında kóp tarmaqlı medicinalıq klinikanı, sonday-aq, usı rayonda 100 orınǵa mólsherlengen emlew-reabilitaciya orayın qurıp, paydalanıwǵa beriw, Ellikqala, Moynaq hám basqa da rayonlardıń turizm potencialınan nátiyjeli paydalanıw, jańa turizm marshrutların ashıw, Nókis qalasında “Nókis siti” joybarın ámelge asırıw, kelesi jılı 16-20 etajlı turaq jaylar qurıw reje qılınbaqta. Húrmetli Prezidentimizdiń saparı dawamında ayrıqsha itibar qaratılǵan máselelerden biri – bul barlıq rayonlarımızdıń tarawlarǵa bóliniwi, ásirese, sharwashılıqtı rawajlandırıw maqsetinde Bozataw rayonın qayta shólkemlestiriw boyınsha bildirgen usınısı boldı. Bul waqıyanı pútkil xalqımız úlken quwanısh penen kútip aldı, desek qátelespeymiz. Mine, ótken sanawlı kúnler ishinde Bozataw rayonın qayta shólkemlestiriw, jergilikli xalıqtıń sociallıq jasaw sharayatların jaqsılaw, aymaqtıń infrastrukturasın qayta tiklew, sharwashılıqtı rawajlandırıw, isbilermenlikti keńnen en jaydırıw boyınsha jumıslar baslap jiberildi. Eń tiykarǵısı, bunday úlken ózgerisler menen jańalanıwlardı qala hám rayonlarımız, barlıq tarawlar mısalında kóplep ushıratıwımız múmkin. Xalqımızǵa degen bunday joqarı itibarı hám ǵamxorlıǵı ushın Húrmetli Prezidentimizge mıń-mıńlap raxmetler aytamız! Húrmetli zamanlaslar! Elimizde júz berip atırǵan usınday ózgerisler menen jańalanıwlarǵa, rawajlanıwlarǵa úles qosıw, xalqımız iygiligi jolında xızmet etiw, Húrmetli Prezidentimizdiń bizge degen isenimin aqlaw – bul ullı baxıt sanaladı. Mine, búgingi bayram aldınan bir qatar zamanlaslarımız orden hám medallar, mámleketlik ataqlar alıw baxtına miyasar bolmaqta. Solar qatarında men ushın da eń joqarı sıylıq – «Ózbekstan Qaharmanı» ataǵınıń beriliwi – bul Húrmetli Shavkat Miromonovichtiń pútkil Qaraqalpaqstan xalqına, usı jerde jasap hám miynet etip atırǵan hár bir insanǵa berilgen joqarı baha dep bilemen hámde bunday itibarı ushın Húrmetli Prezidentimizge, sonday-aq, gúllán xalqımızǵa mıń-mıńlap raxmetler aytaman! Qádirli watanlaslar! Sizlerdi jáne bir márte Ǵárezsizligimizdiń jigirma segiz jıllıq bayramı menen qızǵın kutlıqlayman. Elimizdiń bunnan bılay da gúllep-rawajlanıwı, xalqımızdıń baxıtlı hám abadan turmısı jolındaǵı barlıq iygilikli islerińiz ońınan kele bersin, deymiz! Ilayım, ata-babalarımız ásirler dawamında árman etken Ǵárezsizligimiz máńgi bolıp, Watanımızdıń ullı keleshegin qurıw ushın úles qosıw baxtı hámmemizge nesip etsin!