Joqarǵı Keńesiniń Baslıǵı qubla Koreyalı investorlardı qabıllaw

Usı jılı 23-sentyabr kúni Qaraqalpaqstan Respublikası Joqarǵı Keńesinde Ózbekstannıń Koreya Respublikasındaǵı ayrıqsha hám tolıq huqıqlı elshisi Vitaliy Fen basshılıǵındaǵı qubla koreyalı investorlardı qabıllaw máresimi boldı. Ilajda Qaraqalpaqstan Respublikası Joqarǵı Keńesiniń Baslıǵı M.Erniyazov miymanlardı respublikamızǵa saparı menen qutlıqlap, Prezidentimizdiń basshılıǵında rawajlanǵan sırt  ellerden, sonıń ishinde, Koreya Respublikasınan investiciyalar alıp keliw, birgelikte qospa kárxanalar shólkemlestiriw, tovar aylanısınıń kólemin keńeytiw baǵdarında alıp barılıp atır­ǵan keń kólemli ilajlarǵa toqtap ótti. Atap ótilgenindey, Ózbekstan Respublikası Prezidenti Shavkat Mirziyoev 2018-jıldıń 15-16-noyabr kúnleri respublikamızǵa saparı dawamında Qıtay, Koreya, Kuveyt, Germaniya, Yaponiya mámleketlerindegi elshiler aldına hár bir qala hám ra­yonǵa investiciya alıp keliw juwapkershiligin júklegen edi. Bul baǵdardaǵı jumıslar basqıshpa-basqısh dawam etpekte. Óz gezeginde miymanlardan elshi hám «Noroo Paint» kompaniyasınıń vice-prezidenti Kim Bong Dje, usı kompaniyanıń bas menendjeri Choi Chang Sok, «Evergreen Motors» kompaniyasınıń baslıǵı — Ózbekstan Respublikası Bas ministriniń húrmetli másláhátshisi Kim Chang Keon, «Evergreen Interneyshnl» kompa­niyasınıń vice-prezidenti Byun Min Xo, «Evergreen Motors» kompaniyasınıń vice-prezidenti Kim Ik Dong jıllı-júzlilik penen kútip alǵanı ushın respublikamız basshısına minnetdarshılıq bildirip, bul jerde investorlar ushın jaratılǵan sharayatlarǵa joqarı baha berdi. Ilaj dawamında eki tárepleme rejeler, keleshekte sawda-ekonomikalıq, mádeniy-gumanitarlıq hám investiciya máseleleri boyınsha birge islesiw baǵdarında óz-ara pikir alısıwlar boldı.