JOQARǴÍ KEŃES BASLÍǴÍ PREZIDENT MEKTEBINIŃ PITKERIWShILERIN QUTLÍQLADÍ

Qaraqalpaqstan Respublikası Joqarǵı Keńesiniń Baslıǵı M.Kamalov paytaxtımızdaǵı Prezident mektebinde ótkerilgen sońǵı qońıraw ilajında qatnastı. Ózbekstan hám Qaraqalpaqstan Respublikaları mámleketlik gimni atqarıldı.   Ilajda Joqarǵı Keńes Baslıǵı Prezident mektebi pitkeriwshilerin shın kewilden qutlıqladı, olardıń keleshekte Watanımızdıń rawajlanıwına, onıń xalıqaralıq maydandaǵı abroyınıń artıwına úlken úles qosatuǵınına bekkem isenim bildirip, olarǵa bul jolda tasqın tabıslar tiledi. Atap ótilgenindey, Prezidentimiz tárepinen Qaraqalpaqstan Respublikasında barlıq tarawlar sıyaqlı bilimlendiriw tarawın rawajlandırıwǵa ayrıqsha itibar qaratılmaqta. Ózbekstan Respublikası Prezidenti Shavkat Mirziyoev orınlarda ámelge asırılıp atırǵan reformalar, dóretiwshilik jumısları, iri joybarlar menen tanısıw maqsetinde 2018-jıldıń 15-16-noyabr kúnleri  respublikamızǵa saparı waqtında elimizdiń hár bir aymaǵında birewden jańa tiptegi Prezident mekteplerin shólkemlestiriw, bul jumıstı Qaraqalpaqstannan, Nókis qalasınan baslawdı usınıs etken edi. Elbasshımızdıń 2019-jıl 20-fevral kúngi «Prezident mekteplerin shólkemlestiriw ilajları haqqında»ǵı qararı tiykarında zamanagóy, barlıq qolaylıqlarga iye mektep paydalanıwǵa tapsırıldı.   Mektepte oqıw procesi qaraqalpaq, ózbek tillerinde, sonday-aq, «STEAM» bilimlendiriw baǵdarlaması tiykarında alıp barılmaqta. Matematika, fizika, ximiya, biologiya hám málimleme texnologiyaları pánleri ingliz tilinde oqıtılmaqta. Jergilikli oqıtıwshılır menen bir qatarda sırt ellerden tájiriybeli qánigeler oqıwshı jaslarǵa bilim bermekte. Nátiyjede oqıwshılar óz qábiletin hám talantın júzege shıǵarıw, dúnyanıń rawajlanǵan mámleketleriniń eń kúshli joqarı oqıw orınlarında bilim alıw imkaniyatlarına iye bolmaqta. Búgin mektepti 24 oqıwshı pitkermekte. Olardıń kópshiligi sırt eldiń eń aldı joqarı oqıw orınlarına kiriw baxtına miyasar bolǵanlıǵı bársheni birdey quwandıradı. Joqarǵı Keńes Baslıǵı tárepinen úlgili, belsendi oqıwshılarǵa sertifikatlar tapsırılıp, olardı kamalǵa keltirip, tárbiyalaǵan ata-analarına, olarǵa bilim bergen muǵallimlerge minnetdarshılıq bildirildi.         Ilajda sońǵı qońıraw qaǵıldı. Mektep oqıwshıları atqarıwındaǵı qosıq hám oyınlar jıynalǵanlarǵa kóterińki keypiyat inam etti.

Qaraqalpaqstan Respublikası Joqarǵı Keńesiniń baspasóz xızmeti