Baspasóz hám ǵalaba xabar quralları xızmetkerleri kúni belgilendi

Qaraqalpaq mámleketlik jas tamashagóyler teatrında 27-iyun – Baspasóz hám ǵalaba xabar quralları xızmetkerleri kúni múnásibeti menen bayram ilajı ótkerildi. Saltanatlı ilajda baspasóz hám ǵalaba xabar quralları xızmetkerleri, taraw veteranları qatnastı. Qaraqalpaqstan Respublikası Joqarǵı Keńesiniń komitet baslıǵı D.Qurbaniyazov Baspasóz hám ǵalaba xabar quralları xızmetkerlerine Qaraqalpaqstan Respublikası Joqarǵı Keńesi menen Ministrler Keńesiniń bayram qutlıqlawın oqıp esittirdi. Qaraqalpaqstan Respublikası Joqarǵı Keńesi Baslıǵınıń orınbasarı A.Davletov baspasóz hám ǵalaba xabar quralları xızmetkerlerin qutlıqlap, sońǵı jıllarda elimizde Húrmetli Prezidentimiz basshılıǵında málimleme hám sóz erkinligin támiyinlew, ǵalaba xabar quralların hár tárepleme qollap-quwatlaw, taraw pidayıların múnásip xoshametlewge ayrıqsha itibar qaratılıp atırǵanlıǵın atap ótti. Qaraqalpaqstan Respublikası Joqarǵı Keńesi Prezidiumınıń qararı menen elimizdiń sociallıq-ekonomikalıq, jámiyetlik-siyasiy hám mádeniy turmısında júz berip atırǵan ózgerisler menen jańalanıwlardı keń jámiyetshilikke jetkeriwdegi belsendiligi, xalıqtıń ruwxıy dúnyasın bayıtıwdaǵı pidayılıǵı, óz kásibine bolǵan sadıqlıǵı ushın bir topar baspasóz hám ǵalaba xabar quralları xızmetkerleri húrmetli ataq hám kókirek belgileri menen sıylıqlandı. Sonday-aq, ilajda Qaraqalpaqstan Respublikası Málimleme hám ǵalaba kommunikaciyalar basqarması   dúzilgenine 90 jıl, «Qaraqalpaqstan jasları» gazetası   shıǵıp baslaǵınına 90 jıl, «Xalq minbari» gazetası hám «Miynet bayraǵı» gazetasına 75 jıl, «Qanlıkól xabarları» gazetası jarıq kórgenine 50 jıl, «Qaraqalpaq ádebiyatı» gazetası shıǵıp baslaǵınına 10 jıl tolıwı múnásibeti menen usı gazetalar redakciyalarına, sonıń menen birge, bir qatar baspasóz, televidenie hám radio, internet jurnalistikası, málimleme xızmeti, baspaxana xızmetkerlerine Qaraqalpaqstan Respublikası Joqarǵı Keńesi menen Ministrler Keńesi atınan bahalı sawǵalar tapsırıldı. Ilajda kórkem óner sheberleri hám jas talant iyeleriniń atrqarıwında koncert baǵdarlaması qoyıp berildi. Bunday ilajlar respublikamız qala hám rayonlarında da shólkemlestiriwshilik penen ótkerilmekte.

Qaraqalpaqstan Respublikası Joqarǵı Keńesiniń baspasóz xızmeti