MÁMLEKETLIK GRANTLAR JEŃIMPAZLARÍNA SERTIFIKATLAR TAPSÍRÍLDÍ

2-iyul kúni Qaraqalpaqstan Respublikası Joqarǵı Keńesinde Joqarǵı Keńes janındaǵı mámleketlik emes kommerciyalıq emes shólkemlerdi hám puqaralıq jámiyetiniń basqa da institutların qollap-quwatlaw Jámiyetlik fondı tárepinen mámleketlik grantlar ushın járiyalanǵan tańlawlardıń jeńimpazlarına sertifikat tapsırıw máresimi ótkerildi. Onda Qaraqalpaqstan Respublikası Joqarǵı Keńesi janındaǵı Sociallıq sheriklik boyınsha jámiyetlik komissiyası aǵzaları, Joqarǵı Keńes janındaǵı mámleketlik emes kommerciyalıq emes shólkemlerdi hám puqaralıq jámiyetiniń basqa da institutların qollap-quwatlaw Jámiyetlik fondı, mámleketlik emes kommerciyalıq emes shólkemler hámde ǵalaba xabar quralları wákilleri qatnastı. Qaraqalpaqstan Respublikası Joqarǵı Keńesi Baslıǵınıń orınbasarı A.Davletov Húrmetli Prezidentimiz basshılıǵında elimizde demokratiyalıq reformalardı ámelge asırıwda mámleketlik emes kommerciyalıq emes shólkemler hám puqaralıq jámiyetiniń basqa da institutların qollap-quwatlaw, olardıń sociallıq belsendiligin arttırıw baǵdarında bir qatar nátiyjeli jumıslar ámelge asırılıp atırǵanlıǵın ayrıqsha atap ótti. Mámleketimiz basshısınıń usı jıl 3-marttaǵı «Mámleketlik emes kommerciyalıq emes shólkemlerdi mámleket tárepinen qollap-quwatlaw, olardıń jumısınıń erkinligi, huqıqları hám nızamlı máplerin támiyinlewge baylanıslı qosımsha ilajlar haqqında»ǵı qararı respublikamızda ámelge asırılıp atırǵan reformalarda belsene qatnasıwshı hám birge islesiwshi sıpatında mámleketlik emes kommerciyalıq emes shólkemlerdiń rolin jáne de arttırıw, olardıń huqıqları menen nızamlı mápleriniń qorǵalıwın bekkemlew, mámleket tárepinen qollap-quwatlaw kólemin keńeytiw jáne olarǵa qolaylı sharayat jaratıwda úlken áhmiyetke iye bolmaqta. Qararǵa muwapıq Qaraqalpaqstan Respublikası Joqarǵı Keńesi janındaǵı mámleketlik emes kommerciyalıq emes shólkemlerdi hám puqaralıq jámiyetiniń basqa da institutların qollap-quwatlaw Jámiyetlik fondına 2021-jıl ushın jergilikli byudjet esabınan 1 milliard swmnan aslam qarjı ajıratıldı. Jámiyetlik fond tárepinen usı jıldıń 20-may sánesinen 20-iyun sánesine deyingi múddet aralıǵında mámleketlik grantlar ushın “Jámiyetimizde shańaraq institutın bekkemlew hám hayal-qızlardı sociallıq jaqtan qollap-quwatlaw” atamasında 1-tańlawın hámde “Jaslardı qollap-quwatlaw hám xalıqtıń salamatlıǵın bekkemlew jılı” Mámleketlik baǵdarlamasınıń orınlanıwın támiyinlewde mámleketlik emes, kommerciyalıq emes shólkemlerdiń joybarların qollap-quwatlaw” atamasında 2-tańlawın járiyalaǵan edi. Tańlawlarǵa mámleketlik emes kommerciyalıq emes shólkemler tárepinen bir neshe joybarlar usınılıp, bul joybarlar Joqarǵı Keńes janındaǵı Sociallıq sheriklik boyınsha jámiyetlik komissiyasınıń Jumısshı toparı tárepinen dáslepki tárizde úyrenip shıǵıldı hám komissiyanıń 28-iyun kúni ótkerilgen májilisinde jeńimpazlar anıqlandı. Ilajda tańlawlarda jeńimpaz bolǵan Ózbekstan Jurnalistleri dóretiwshilik awqamınıń Qaraqalpaqstan bólimi, “Ónerment” awqamınıń Qaraqalpaqstan Respublikası basqarması, “Ózbekstan Mayıplar Associaciyası” Qaraqalpaqstan Respublikası aymaqlıq bólimi, Ózbekstan Mayıplar jámiyetiniń Taxtakópir rayonlıq bólimi, “Panaceya” jámiyetlik birlespelerine sertifikatlar tapsırıldı.

Qaraqalpaqstan Respublikası Joqarǵı Keńesiniń baspasóz xızmeti