XALÍQLAR DOSLÍǴÍ KÚNI BELGILENDI

30-iyul – Xalıqlar doslıǵı kúni múnásibeti menen saltanatlı ilaj ótkerildi. Videokonferenc baylanıs tárizinde ótkerilgen ilajda Nókis qalasında shólkemlestirilgen studiyada Qaraqalpaqstan Respublikası Joqarǵı Keńesiniń Baslıǵı M.Kamalov, Ózbekstan Respublikası Oliy Majlisi Senatı aǵzaları, Joqarǵı Keńes deputatları, húkimet aǵzaları, elimizde jasap atırǵan túrli millet wákilleri, milliy-mádeniy oraylardıń xızmetkerleri qatnastı. Ózbekstan Respublikası Prezidentiniń Xalıqlar doslıǵı kúni múnásibeti menen bayram qutlıqlawın Ózbekstan Respublikası Oliy Majlisi Senatınıń Baslıǵı T.Narbaeva oqıp esittirdi. Atap ótilgenindey, Ózbekstan – úlken imkaniyat hám resurslarǵa iye bolǵan mámleket. Biraq biziń eń úlken baylıǵımız – túrli millet hám konfessiyalar wákilleri arasındaǵı tınıshlıq hám turaqlılıq, óz-ara húrmet hám awızbirshilik bolıp esaplanadı. Konstituciyamız hám nızamlarımızda Ózbekstan Respublikasınıń bárshe puqaraları, milleti, tili hám dinine qaramastan teń huqıq hám erkinliklerge iye ekeni belgilep qoyılǵan. Olarǵa óz mádeniyatın, dástúrin hám úrp-ádetlerin rawajlandırıw ushın bárshe sharayatlar jaratılǵan. Búgingi kúnde elimizde 130 dan aslam millet hám elat wákilleri tatıw hám awızbirshilikli shańaraq bolıp jasap, barlıq tarawda pidayılıq penen miynet etip, elimizdiń rawajlanıwı hám gúllep-jasnawı ushın múnásip úles qosıp kelmekte. Qutlı bayram – Xalıqlar doslıǵı kúni múnásibeti menen áne sonday watanlaslarımız  mámleketlik sıylıqlar menen sıylıqlandı. Qaraqalpaqstan Respublikasınan Qaraqalpaqstan diyqanshılıq ilimiy-izertlew institutı górek selekciyası hám tuqımshılıǵı bólimi baslıǵı Uzaqbay Aytjanov, Qaraqalpaqstan Respublikası kásiplik awqamları shólkemleri birlespesi Keńesi baslıǵı, Ózbekstan Respublikası Oliy Majlisi Senatı aǵzası Ulıqbek Jalmenov «Mehnat shuhrati» ordeni menen, Nókis qalasındaǵı «Múriwbet» mayıplıǵı bolǵan shaxslar ushın hayallar internat úyi direktorı Lidiya Kim I dárejeli «Soǵlom avlod uchun» ordeni menen, Qońırat rayonı medicina birlespesiniń Jaslıq emlew profilaktika mákemesi miyirbiykesi Janar Júginisova II dárejeli «Salomatlik» ordeni menen, «Wzbekgeofizika» akcionerlik jámiyetiniń «Ustyurt geofizika ekspediciyasi» filialı Ústirt kán geofizika partiyası topar baslıǵı Zaripbay Batbaev «Dwstlik» ordeni menen, Moynaq rayonındaǵı «Tik ózek» awıl puqaralar jıyını baslıǵınıń shańaraq, hayal-qızlardı qollap-quwatlaw, sociallıq máseleler boyınsha orınbasarı Dárigúl Ametova «Shuhrat» medalı menen sıylıqlandı.

Qaraqalpaqstan Respublikası Joqarǵı Keńesiniń baspasóz xızmeti