MÁMLEKETLIK SÍYLÍQLAR TAPSÍRÍLDÍ

Mámleketimizde milletleraralıq doslıq hám tatıwlıqtı bekkemlew, jámiyetimizde túrli millet wákilleri arasındaǵı óz-ara awızbirshilik, keńpeyillik, miyrim-shápáát ortalıǵın saqlaw, milliy mádeniyatlar, úrp-ádet hám dástúrlerdiń ózine tánligin saqlaw jáne rawajlandırıwǵa qosqan múnásip úlesi, sırt mámleketler menen eki tárepleme paydalı qatnasıqlar hám mádeniy-aǵartıwshılıq baylanıslardı jańa basqıshqa kóteriw, mámleketimizdiń tınıshlıq súyer hám watansúyiwshi siyasatın xalıqaralıq kólemde keńnen úgit-násiyalaw baǵdarındaǵı úlken xızmetleri, jas áwladtı Watanǵa muhabbat hám sadıqlıq, milliy hám ulıwmainsanıylıq qádiriyatlarǵa húrmet ruwxında tárbiyalaw jolındaǵı ibratlı jumısları jáne jámiyetlik turmısta belsene qatnasqanı ushın bir topar jerleslerimiz Ózbekstan Republikası Prezidentiniń pármanına muwapıq, Xalıqlar doslıǵı kúni múnásibeti menen orden hám medallar, sonday-aq, Ózbekstan Respublikası Ministrler Kabinetiniń qararı menen «Xalıqlar doslıǵı» kókirek belgisi menen sıylıqlanǵan edi. Qaraqalpaqstan Respublikası Joqarǵı Keńesinde usı sıylıqlardı tapsırıw máresimi boldı. Ilajda Qaraqalpaqstan Respublikası Joqarǵı Keńesiniń Baslıǵı M.Kamalov, Ózbekstan Respublikası Ministrler Kabineti janındaǵı Milletleraralıq qatnasıqlar hám sırt el mámleketleri menen doslıq baylanısları komiteti baslıǵınıń orınbasarı A.Toshev jıynalǵanlardı Xalıqlar doslıǵı kúni menen jáne bir márte qızǵın qutlıqladı. Atap ótilgenindey, Húrmetli Prezidentimiz baslaması menen bıyıl birinshi márte belgilengen bul qutlı sáne elimizde jasap atırǵan túrli millet wákilleriniń bir-birine bolǵan doslıǵın, awızbirshiligin, kengpeyilligin jáne bir márte ayqın sáwlelendirdi. Búgingi kúnde elimizde 130 dan aslam millet hám elat wákilleri tatıw hám awızbirshilikli shańaraq bolıp jasap, barlıq tarawda pidayılıq penen miynet etip, elimizdiń rawajlanıwı hám gúllep-jasnawı ushın múnásip úles qosıp kelmekte. Konstituciyamız hám nızamlarımızda Ózbekstan Respublikasınıń bárshe puqaraları, milleti, tili hám dinine qaramastan teń huqıq hám erkinliklerge iye ekeni belgilep qoyılǵan. Olarǵa óz mádeniyatın, dástúrin hám úrp-ádetlerin rawajlandırıw ushın bárshe sharayatlar jaratılǵan. Ilajda orden hám medallar, kókirek belgileri óz iyelerine tapsırıldı. Sonday-aq, respublikamızda jumıs alıp barıp atırǵan milliy mádeniy oraylarǵa Qaraqalpaqstan Respublikası Joqarǵı Keńesi hám Ministrler Keńesiniń bahalı sawǵaları tapsırıldı. Sıylıqlanǵanlar atınan Qaraqalpaqstan Respublikası kásiplik awqamları shólkemleri birlespesi Keńesi baslıǵı, Ózbekstan Respublikası Oliy Majlisi Senatı aǵzası, «Mehnat shuhrati» ordeniniń iyesi U.Jalmenov, Qońırat rayonı medicina birlespesiniń Jaslıq emlew profilaktika mákemesi miyirbiykesi, II dárejeli «Salomatlik» ordeniniń iyesi J.Júginisova hám basqalar shıǵıp sóylep, miynetlerin joqarı bahalaǵanı ushın Prezidentimizge sheksiz minnetdarshılıq bildirdi.

Qaraqalpaqstan Respublikası Joqarǵı Keńesiniń baspasóz xızmeti

M.Habibullaev túsirgen súwretler