Wákillerimiz «Parlament oyınları» sport jarıslarında bárshe sport turinen sıylı orınlardı iyeledi

2021-jıldıń 14-avgust kúni Oliy Majlis Senatı baslaması menen Turizm hám sport ministrligi, Gender teńlikti támiyinlew máseleleri boyınsha komissiyası menen birgelikte xalıq deputatları jergilikli Keńeslerdiń deputatları, Ózbekstan Respublikası Oliy Majlisi Senatı janındaǵı Jaslar parlamenti hámde Ózbekstan Respublikası Oliy Majlis Senatı aǵzaları hám apparatı xızmetkerleri arasında Ózbekstan Respublikası Oliy Majlisi Senatı Baslıǵınıń kubogı ushın «Parlament oyınları» sport jarısları ótkerildi. Ózbekstan Respublikası Oliy Majlisi Senatı Keńesiniń 2020-jıl 30-dekabrdegi qararına muwapıq, senatorlar hám xalıq deputatları jergilikli Keńesleri deputatları, Senat janındaǵı Jaslar parlamenti aǵzalarınıń denetárbiya hám sport penen turaqlı túrde shuǵıllanıwın támiyinlew, xalıq arasında salamat turmıs tárizin úgit-násiyatlaw maqsetinde ótkerilgen «Parlament oyınları» sport jarıslarında qatnasıwshılar sporttıń mini-futbol, voleybol, stol tennisi hámde badminton sıyaqlı túrleri boyınsha bellesti. Quwanıshlı tárepi, bárshe sport túrlerinen Qarqalpaqstan Respublikası Joqarǵı Keńesi, xalıq deputatları rayonlıq (qalalıq) keńeslerinen wákillerimiz belsene qatnasıp, joqarı nátiyjelerge eristi. Atap aytqanda, sporttıń mini-futbol túri boyınsha qatnasqan Qaraqalpaqstan Respublikası Joqarǵı Keńesi komandası ekinshi orındı iyeledi. Badminton boyınsha hayal-qızlar arasında Joqarǵı Keńes deputatı Zuxra Reymova, stol tennisi boyınsha xalıq deputatları Qaraózek rayonlıq Keńesi deputatı Gúlzira Sidiqova ekinshi orınlardı, sonday-aq, erler arasında voleybol boyınsha xalıq deputatları Nókis rayonlıq Keńesi komandası sıylı úshinshi orındı iyeledi.   Jarıs jeńimpazları shólkemlestiriwshiler tárepinen medal, diplom hám bahalı sawǵalar menen sıylıqlandı.

Qaraqalpaqstan Respublikası Joqarǵı Keńesiniń baspasóz xızmeti