ELIMIZ ISBILERMENLERI MENEN UShÍRASÍW BOLÍP ÓTTI
1981
Usı jıldıń 20-avgust kúni Ózbekstan Respublikası Prezidenti Sh.Mirziyoev mámleketimiz isbilermenleri menen ashıq sawbetlesiw ótkerip, elimizde isbilermenlikti bunnan bılayda rawajlandırıw baǵdarında bir qatar áhmiyetli wazıypalar hám rejelerge toqtalıp ótken edi.
Búgin Qaraqalpaqstan Respublikası Joqarǵı Keńesiniń Baslıǵı M.Kamalov hámde Ózbekstan Sawda-sanaat palatası baslıǵı A.Ikramov basshılıǵında elimiz isbilermenleri menen ushırasıw ótkerildi.
Qaraqalpaqstan Respublikası Joqarǵı Keńesi, qala hám rayonlarda shólkemlestirilgen studiyalarda ótkerilgen ushırasıwda Ózbekstan Respublikası Oliy Majlisi Senatı aǵzaları, Sawda-sanaat palatası wákilleri, Joqarǵı Keńes deputatları, húkimet aǵzaları, ministrlik hám hákimlikler, mákemeler, shólkemler hám kommerciyalıq bankler baslıqları, isbilermenler qatnastı.
Ushırasıwdı Qaraqalpaqstan Respublikası Joqarǵı Keńesiniń Baslıǵı M.Kamalov ashtı.
Atap ótilgenindey, Húrmetli Prezidentimiz ushırasıwda isbilermenlikti qollap-quwatlaw, sistemalı mashqalalardı saplastırıw ilajların dodalap, isbilermenlerdiń usınısların, olardıń múrájat hám mashqalaların tıńladı. Elimizde isbilermenlikti jánede rawajlandırıw boyınsha bir qatar reje hám wazıypalardı belgilep berdi.
Eń áhmiyetli mashqalalardı sistemalastırıp, olardı sheshiwge qaratılǵan 7 áxmiyetli baǵdar boyınsha ilajlar baǵdarlaması islep shıǵılǵanı, bul boyınsha bir qatar imkaniyatlar, qolaylıqlar jaratılıwı atap ótilgeni isbilermenlerdiń erteńgi kúnine bolǵan isenimin jánede arttırdı.
Ásirese, Qaraqalpaqstanda isbilermenler ushın sharayatlar jaratıw boyınsha usınıs hám baslaması isbilermenlerdi jánede ruwxlandırıp jiberdi.
Ushırasıwdı Ózbekstan Sawda-sanaat palatası baslıǵı A.Ikramov alıp bardı.
Onda Prezidentimiz tárepinen isbilermenlikti rawajlandırıw ushın belgilep berilgen jónelisler boyınsha imkaniyatların iske salıp, óz isbilermenligin rawajlandırıwdı niyet etken bir qatar isbilermenlerimiz sózge shıǵıp, ózleriniń pikir hám usınısların bildirdi.
Qaraqalpaqstan Respublikası Joqarǵı Keńesiniń baspasóz xızmeti