“Keleshek liderleri” klubı shólkemlestirildi
2690
Usı jıldıń 25-avgust kúni Qaraqalpaqstan Respublikası Joqarǵı Keńesinde respublikamızda shólkemlestirilgen “Keleshek liderleri” klubınıń aǵzaları menen ushırasıw ótkerildi.
Ushırasıwda Qaraqalpaqstan Respublikası Joqarǵı Keńesi Baslıǵınıń orınbasarı A.Davletov, Ózbekstan Respublikası Prezidenti janındaǵı Mámleketlik xızmetin rawajlandırıw agentligi juwaplı xızmetkeri D.Karimov sózge shıǵıp, “Keleshek liderleri” klubınıń aǵzaların qutlıqladı hám keleshekte olardıń óz bilim hám qábileti menen Watanımızdıń rawajlanıwına múnásip úles qosatuǵınlıǵına bekkem isenim bildirdi.
Prezidentimiz usı jıldıń 30-iyun kúni Jaslar kúnine baǵıshlanǵan saltanatlı máresimde qábiletli jaslar arasınan jańa áwlad rezerv kadrları – «Keleshek liderleri» qáliplestiriletuǵının ayrıqsha atap ótken edi.
Mámleketimiz basshısınıń bul baslamasın qollap-quwatlaw maqsetinde 2021-jıl 27-iyul kúni Qaraqalpaqstan Respublikası Joqarǵı Keńesi Prezidiumınıń qararı qabıl etildi.
Qararǵa muwapıq, Qaraqalpaqstan Respublikasında talantlı hám qábiletli jaslardı mámleketlik puqaralıq xızmetine qızıqtırıw, olardı watansúyiwshilik ruwxında tárbiyalawǵa qaratılǵan ilajların ámelge asırıw, perspektivalı kadrlar selekciyası arqalı aymaqlarda joqarı mamanlıqtaǵı mámleketlik puqaralıq xızmetkerler qatlamın hám jańa áwladlar arasınan kadrlar rezervin qáliplestiriw maqsetinde “Keleshek liderleri” klubı shólkemlestirildi.
Bir neshe basqıshlı tańlawlar arqalı tańlap alınǵan eń qábiletli, perspektivalı jaslar klub aǵzalıǵına qabıl etildi.
Qaraqalpaqstan Respublikası Joqarǵı Keńesiniń baspasóz xızmeti