TAŃLAWLARDÍŃ JEŃIMPAZLARÍ MÚNÁSIP SÍYLÍQLANDÍ
2246
Qaraqalpaqstan Respublikası Ministrler Keńesinde Hayal-qızlar mashqalaların sistemalı túrde sheshiw, olardı sociallıq jaqtan qollap-quwatlaw boyınsha Respublika komissiyası tárepinen ótkerilip atırǵan “Kásiplik awqamları laureatı”, “Eń úlgili hayal jumıs beriwshi”, “Eń jaqsı máhálle baslıǵı” hámde “Eń jaqsı sektor baslıǵı” tańlawlarınıń Qaraqalpaqstan Respublikası basqıshı jeńimpazların sıylıqlawǵa baǵıshlanǵan ilaj bolıp ótti.
Onda Qaraqalpaqstan Respublikası Joqarǵı Keńesiniń Baslıǵı M.Kamalov, Ózbekstan kásiplik awqamları Federaciyasınıń Qaraqalpaqstan Keńesi baslıǵı U.Jalmenov sózge shıǵıp, Húrmetli Prezidentimiz tárepinen xalıqtıń sociallıq qorǵawǵa mútáj qatlamın, ásirese, hayal-qızlardı hár tárepleme qollap-quwatlawǵa ayırqsha itibar qaratılıp atırǵanlıǵın atap ótti.
Ózbekstan kásiplik awqamları Federaciyası basshılıǵındaǵı Respublika komissiyası hám onıń quramındaǵı Jumısshı toparlar mámleketimiz aymaqlarında «Hayallar dápteri»ne kirgizilgen hayal-qızlar mashqalaların sistemalı sheshiw hám olarǵa ámeliy járdem kórsetiw barısında keń kólemli jumıslardı ámelge asırmaqta. Sonday-aq, bul iygilikli islerdi ámelge asırıwda úlgili hám sistemalı jumıs alıp barǵan juwaplı xızmetkerlerdi xoshametlew ámeliyatı jolǵa qoyıldı.
Bunda “Kásiplik awqamları laureatı”, “Eń úlgili hayal jumıs beriwshi”, “Eń jaqsı máhálle baslıǵı” hámde “Eń jaqsı sektor baslıǵı” tańlawlarınıń ótkeriliwi úlken áhmiyetke iye bolmaqta. Tańlawlardıń qala hám rayon basqıshları usı jıldıń iyun ayında, Qaraqalpaqstan Respublikası basqıshı iyul ayında ótkerildi.
“Kásiplik awqamları laureatı” tańlawında Kegeyli rayonı “Rus-Islam-Sultan” shańaraqlıq kárxanası baslıǵı Ayjamal Rametova birinshi, Beruniy rayonınan jeke tártiptegi isbilermen Roza Djumanazarova ekinshi, Qaraózek rayonınan jeke tártiptegi isbilermen Zamira Utepbergenova úshinshi orındı iyeledi.
“Eń jaqsı máhálle baslıǵı” tańlawında Nókis qalası “Sarbinaz” MPJ baslıǵı Madiyar Aminov birinshi, Shımbay rayonı “Pashent taw” APJ baslıǵı Azizbek Aytımbetov ekinshi, Qońırat rayonı “Qońırat” MPJ baslıǵı Mariyash Urazalieva úshinshi boldı.
“Eń úlgili hayal jumıs beriwshi” tańlawında Ámudarya rayonı “Tamara tekstil” JShJ baslıǵı Tamara Yusupova birinshi, Qońırat rayonı “Ustyurt gilemleri” islep shıǵarıw kárxanası baslıǵı Guljaysan Saǵınbaeva ekinshi, Shomanay rayonı “SHOMANAY SHAMENAY” JShJ baslıǵı Shaxribanu Yusupbaeva úshinshi orındı iyeledi.
“Eń jaqsı sektor baslıǵı” tańlawında Qaraózek rayonı 1-sektor baslıǵı, rayon hákimi Uzaqbergen Utambetov birinshi, Shomanay rayonı 3-sektor baslıǵı Polat Iskenderov ekinshi, Bozataw rayonı 4-sektor baslıǵı Janibek Kazbekov úshinshi orındı iyeledi.
Tańlawlardıń jeńimpazları hám sıylı orın iyeleri shólkemlestiriwshiler tárepinen sıylıqlandı. Tańlawlardıń Qaraqalpaqstan Respublikası basqıshında birinshi orınlardı iyelegen jeńimpazlar Respublika basqıshında qatnasıw ushın jollama aldı.
Ózbekstan kásiplik awqamları Federaciyasınıń Qaraqalpaqstan Keńesi maǵlıwmatları tiykarında tayarlandı
Qaraqalpaqstan Respublikası Joqarǵı Keńesiniń baspasóz xızmeti