Watanımızdıń joqarı sıylıqları tapsırıldı
2923
Elimiz ǵárezsizligin bekkemlew, xalqımızdıń mánawiyatın rawajlandırıw, ekonomikalıq qúdiretin bekkemlew, tınıshlıǵın saqlaw, xalqımızdıń abadan turmısın támiyinlewdegi ayrıqsha xızmetleri, jámiyetlik jumıslarda belsene qatnasqanı ushın bir topar jerleslerimiz Ózbekstan Respublikası mámleketlik ǵárezsizliginiń 30 jıllıq bayramı qarsańında Prezidentimizdiń pármanları menen húrmetli ataqlar, orden hám medallar, sonday-aq. “Ózbekstan Respublikası ǵárezsizliginiń 30 jıllıǵı” estelik belgileri menen sıylıqlandı.
Qaraqalpaqstan Respublikası Joqarǵı Keńesinde usı sıylıqlardı tapsırıw máresimi boldı.
Ilajda Qaraqalpaqstan Respublikası Joqarǵı Keńesiniń Baslıǵı M.Kamalov jıynalǵanlardı eń ullı, eń áziz bayramımız, elimiz ǵárezsizliginiń 30 jıllıq bayramı menen qızǵın qutlıqladı.
Atap ótilgenindey, sońǵı jılları Prezidentimiz tárepinen turmısımızdıń barlıq tarawlarında keń kólemli reformalar, dóretiwshilik jumısları ámelge asırılmaqta. Jańa Ózbekstandı qurıw, elimizdiń sociallıq-ekonomikalıq turmısında úlken ózgerislerdi ámelge asırıw, xalqımızdıń abadan turmısın támiyinlewge ayrıqsha itibar qaratılmaqta.
Áne sonday iygilikli maqsetlerdi ámelge asırıwda pidayılıq kórsetken, elimiz ǵárezsizliginiń jánede bekkemleniwine úlken úlesin qosıp kiyatırǵan watanlaslarımızdıń miyneti joqarı bahalanbaqta.
Ilajda mámleketlik sıylıqlar – húrmetli ataqlar, orden hám medallar, estelik belgileri óz iyelerine saltanatlı jaǵdayda tapsırıldı.
Sıylıqlanǵanlar atınan sózge shıqqanlar miynetlerin joqarı bahalaǵanı ushın Prezidentimizge sheksiz minnetdarshılıq bildirdi.
Ilajda Qaraqalpaqstan Respublikası Joqarǵı Keńesi Baslıǵınıń orınbasarı A.Davletov qatnastı.
Qaraqalpaqstan Respublikası Joqarǵı Keńesiniń baspasóz xızmeti