TARAW PIDAYÍLARÍ MÚNÁSIP SÍYLÍQLANDÍ

1-oktyabr – Muǵallimler hám ustazlar kúni múnásibeti menen Ózbekstan Respublikası Prezidentiniń pármanına muwapıq, tálim-tárbiya sistemasında ayrıqsha órnek kórsetken  xızmetkerlerden bir toparı,  sonday-aq, Qaraqalpaqstan Respublikası Joqarǵı Keńesi Prezidiumınıń qararına muwapıq, elimizde tálim-tárbiya sistemasın dáwir talapları tiykarında jetilistiriw, tarawdaǵı reformalardı nátiyjeli ámelge asırıw jumıslarına qosqan salmaqlı úlesi, jaslarǵa ilim úyretiw hám zamanagɵy kásip-ɵnerlerge baǵdarlaw, olardı ana-Watanǵa muhabbat, ǵárezsizlik ideyalarına sadıqlıq ruwxında tárbiyalawdaǵı kɵp jıllıq jemisli miynetleri hámde jámiyetlik turmıstaǵı belsendiligi ushın bir topar watanlaslarımız húrmetli ataqlar hám kɵkirek belgileri menen sıylıqlandı. Qaraqalpaqstan Respublikası Joqarǵı Keńesinde 30-sentyabr kúni usı sıylıqlardı tapsırıw máresimi boldı. Saltanatlı ilajda Qaraqalpaqstan Respublikası Joqarǵı Keńesiniń Baslıǵı M.Kamalov jıynalǵanlardı 1-oktyabr – Muǵallimler hám ustazlar kúni menen qızǵın qutlıqladı. Atap ótilgenindey, sońǵı jıllarda Húrmetli Prezidentimiz tárepinen bilimlendiriw tarawına ayrıqsha itibar qaratılıp,  tarawda úlken ózgerisler ámelge asırılmaqta. Áhmiyetlisi, muǵallimler hám ustazlar hámiyshe Húrmetli Prezidentimizdiń hám mámleketimizdiń itibarında bolıp kelmekte. Bayram múnásibeti menen bir topar watanlaslarımız elimizdiń joqarı sıylıqların alıwǵa miyassar bolıp atırǵanlıǵı áne usı itibar hám ǵamxorlıqtıń nátiyjesi bolıp esaplanadı. Ilajda hurmetli ataqlar, orden hám medallar, kókirek belgileri óz iyelerine tapsırıldı. Sıylıqlanǵanlar atınan sózge shıqqanlar miynetlerin joqarı bahalaǵanı ushın respublikamız basshılarına sheksiz minnetdarshılıq bildirdi. Ilajda Qaraqalpaqstan Respublikası Joqarǵı Keńesi Baslıǵınıń orınbasarı A.Davletov, Qaraqalpaqstan Respublikası Ministrler Keńesi Baslıǵı Q.Sariev qatnastı.

Qaraqalpaqstan Respublikası Joqarǵı Keńesiniń baspasóz xızmeti