Korrupciyaǵa qarsı gúresiw boyınsha aymaqlıq Keńesiniń birinshi májilisi bolıp ótti

7-oktyabr kúni Qaraqalpaqstan Respublikası Joqarǵı Keńesinde Qaraqalpaqstan Respublikası korrupciyaǵa qarsı gúresiw boyınsha aymaqlıq Keńesiniń birinshi májilisi bolıp ótti. Onda Ózbekstan Respublikası Korrupciyaǵa qarsı gúresiw agentligi, Sawda-sanaat palatası wákilleri, Qaraqalpaqstan Respublikası korrupciyaǵa qarsı gúresiw boyınsha aymaqlıq Keńesi aǵzaları, ǵalaba xabar quralları xızmetkerleri qatnastı. Májilisti Qaraqalpaqstan Respublikası Joqarǵı Keńesiniń Baslıǵı - Qaraqalpaqstan Respublikası korrupciyaǵa qarsı gúresiw boyınsha aymaqlıq Keńesiniń baslıǵı M.Kamalov ashtı hám basqarıp bardı. Atap ótilgenindey, sońǵı jıllarda mámleketimizde korrupciyanıń aldın alıw hám oǵan qarsı gúresiw, mámleketlik hám jámiyetlik qurılıstıń barlıq tarawlarında korrupciogenlik faktorlarǵa shek qoyıwǵa qaratılǵan keń kólemli reformalar izbe-iz ámelge asırılmaqta. Mámleketlik uyımlardıń juwapkershiligindegi wazıypalar hám funkciyalardı orınlawda júzege keletuǵın korrupciyaǵa baylanıslı qáwip-qáterlerdi bahalaw sistemasın jetilistiriw hám mámleketlik xızmetke hadallıq standartların engiziw boyınsha jumıslar ámelge asırılmaqta. Mámlekette byurokratiyalıq tosqınlıqlardı saplastırıw hám «jasırın ekonomika»nı  qısqartıw ilajları kórilmekte hám «Korrupciyasız taraw» joybarları ámelge asırılmaqta. Sonıń menen birge, korrupciyaǵa qarsı gúresiw nátiyjeliligin túp-tiykarınan arttırıw boyınsha belgilengen wazıypalar korrupciya jaǵdaylarınıń sebepleri menen sharayatların anıqlaw, olardı saplastırıwdıń tásirsheń sistemasın jaratıwdı talap etpekte. Bul jumıslarǵa puqaralıq jámiyeti institutları hám mámleketlik emes sektordıń basqa wákillerin de keńnen tartıw zárúrligi tuwılmaqta. Ózbekstan Respublikası Prezidentiniń 2020-jıl 29-iyun kúngi “Ózbekstan Respublikasında korrupciyaǵa qarsı gúresiw sistemasın jetilistiriw boyınsha qosımsha ilajlar haqqında”ǵı Pármanında Ózbekstan Respublikası korrupciyaǵa qarsı gúresiw milliy keńesi hám onıń aymaqlıq keńeslerin shólkemlestiriwge baylanıslı bir qatar wazıypalar belgilengen. Bul boyınsha Korrupciyaǵa qarsı gúresiw milliy keńesiniń 2021-jıldıń 19-avgusttaǵı májilisi qararına muwapıq, Qaraqalpaqstan Respublikası, wálayatlar hám Tashkent qalası korrupciyaǵa qarsı gúresiw boyınsha aymaqlıq keńesleri haqqındaǵı reje hám aymaqlıq keńesler aǵzalarınıń úlgili dizimi tastıyıqlandı. Májiliste Qaraqalpaqstan Respublikası korrupciyaǵa qarsı gúresiw boyınsha aymaqlıq keńesiniń aǵzaları tanıstırıldı, korrupciyaǵa qarsı gúresiw baǵdarında ámelge asırılıp atırǵan ilajlar hám olardıń orınlanıwında aymaqlıq keńeslerdiń ornı, bizneste korrupciyaǵa qarsı gúresiwde Sawda-sanaat palatasınıń ornı haqqında bayanatlar jasaldı hám pikir-usınıslar tıńlandı.

Qaraqalpaqstan Respublikası Joqarǵı Keńesiniń baspasóz xızmeti