Qońırat rayonı hákimi tayınlandı

Búgin, 20-yanvar kúni xalıq deputatları Qońırat rayonlıq Keńesiniń gezeksiz otız segizinshi sessiyası bolıp ótti. Sessiyada shólkemlestiriw máselesi qaraldı. Sessiya kún tártibine muwapıq,  Qońırat rayonınıń hákimi lawazımına Madaminov Bekzod Baxodirovichti tayınlaw máselesi kórip shıǵıldı. Qaraqalpaqstan Respublikası Konstituciyası 81-statyasınıń 6-bántine muwapıq, Qońırat rayonınıń hákimi lawazımına Madaminov Bekzod Baxodirovich tayınlandı. Sessiyaǵa Qaraqalpaqstan Respublikası Joqarǵı Keńesiniń Baslıǵı M.Kamalov qatnastı. Maǵlıwmat ushın, Madaminov Bekzod Baxodirovich miynet jolı dawamında Ɵzbekstan Respublikası Finans ministrliginiń Qaraqalpaqstan Respublikası boyınsha ǵaznashılıq basqarmasında sektor baslıǵı, Beruniy rayonı boyınsha ǵaznashılıq bѳlimi baslıǵı, Beruniy rayonı hákiminiń investiciyalar, innovaciyalar, menshiklestirilgen kárxanalarǵa kѳmeklesiw hám kishi sanaat zonaları hám de turizmdi rawajlandırıw máseleleri boyınsha orınbasarı sıyaqlı bir qatar juwapkerli lawazımlarda jumıs islegen. Ol búgingi kúnge shekem Mámleketlik aktivlerin basqarıw agentliginiń Qaraqalpaqstan Respublikası basqarması baslıǵı bolıp islep keldi. Esletip ótemiz, usı kúnge shekem Qońırat rayonı hákimi lawazımında Q.Xalmuratov islep kelgen edi.

Qaraqalpaqstan Respublikası Joqarǵı Keńesiniń baspasóz xızmeti