Prezident moynaqshılar menen sóylesti
Ózbekstan Respublikası Prezidenti Shavkat Mirziyoev 23-fevral kúni Moynaqqa keldi.
Hámmemizge belgili, bul jer mámleketimizdiń alıs aymaqlarınan biri. Eń jaqın qala Qońıratqa shekem 100, Qaraqalpaqstan orayı – Nókiske shekem 200 kilometr aralıq bar. Bul kommunikaciyada qıyınshılıq payda etiwi tábiyǵıy.
Sonlıqtan moynaqshılardıń turmısı, sharayatlarına mámleketimiz basshısınıń itibarı basqasha. Bul aymaqtı rawajlandırıw boyınsha eki qarar qabıl etilip, mánzilli baǵdarlamalar ámelge asırılǵan. Prezidentimizdiń ózi de Moynaqqa eki márte – 2018 hám 2019-jılları kelgen. Sol waqıtta bul jerde transport kommunikaciyaların jaqsılaw boyınsha kórsetpe berilgen edi. Soǵan muwapıq, avtomobil jolları ońlandı. Moynaq aeroportı jańalanıp, iske qosıldı.
Bul «hawa portı» 1947-jılı qurılǵan bolıp, aldın kishi samolyotlardı qabıl etken. Keyin ala ulıwma islemey qalǵan. Búgin ómirge qaytqan bul aeroportta birinshi márte Ózbekstan Prezidentiniń samolyotı kelip qondı.
Mámleketimiz basshısı bul jerdegi dóretiwshilik jumısları menen tanıstı. Aeroportta 50 jolawshıǵa mólsherlengen jańa terminal qurılǵan, ushıw-qonıw jolı hám maydanshalar ońlanǵan. Kompleks átirapı kóklemzarlastırılǵan.
Prezident bul jerde moynaqshı jas úlkenler, máhálle baslıqları, hákim járdemshileri hám jaslar menen ushırastı.
– Keyingi bes jılda kóp nárseni úyrendik, aldın isenilmegen zatlarǵa isendik. Men birinshi márte kelgenimde «mádeniyat Moynaqtan baslanadı» degen edim. Sonday bolıp atır. Mine usı aeroport da bir mısal. Endi Tashkent-Moynaq-Nókis aviaqatnawı jolǵa qoyıladı,-dedi Shavkat Mirziyoev.
Sapardaǵı jáne bir jańalıq – Aralboyın birgelikte rawajlandırıw maqsetinde Qaraqalpaqstan Respublikası rayonları belgili bir wálayatlarǵa biriktirilgen. Prezident onıń sebebi hám áhmiyetin túsindirip berdi.
– Aralboyında jaǵday jaman dep kópshilik aytadı. Biraq hámme de bul jerge kelip kórmegen. Araldıń hawasınan nápes alıwı, sharayattı kórip, ádil baha beriwi ushın bul jerge pútkil respublikadan basshılardı jiberdim. Qaraqalpaqstannıń rawajlanıwına úlken qarjı qaratamız,-dedi Prezident.
Mámleketimiz basshısı Moynaqtaǵı áhmiyetli máseleler, keleshektegi jumıslar boyınsha xalıqtıń pikirin soradı.
– Bul jerde qıyınshılıqlarǵa shıdaǵan, miynetkesh adamlar jasaydı. Olarǵa tek ǵana jumıs islew ushın sharayat jaratıp beriwimiz kerek. Biraq qanday kárxana quramız? Samolyot kelgeni biykarǵa emes. Endi ónimlerdi tasıw ańsatlasadı. Sonıń ushın sizlerden ótinish: ashshı, tiykarlı, paydalı gáplerdi aytıń. Birgelikte jaqın eki jılǵa anıq rejelerdi belgilep alıwımız kerek,-dedi Shavkat Mirziyoev.
Jámiyetshilik wákilleri aymaqtaǵı áhmiyetli máseleler boyınsha óz usınısların bildirdi. Prezidentimiz olardı qollap-quwatlap, juwapkerlerge tapsırmalar berdi. Awıl xojalıǵı tarmaqları menen birge xızmet túrlerin keńeytiw, atap aytqanda, kewil ashar oyınlar ushın salıq jeńilliklerin beriw zárúr ekenligin atap ótti. Bul ishki turizmniń rawajlanıwına, jumıs orınlarınıń ashılıwına xızmet etedi.
Moynaq rayonına Tashkent wálayatı biriktirilgen. Ushırasıwda bul wálayat isbilermenleri tárepinen Moynaqta ámelge asırılatuǵın jumıslar haqqında xalıq wákilleri aldında prezentaciya ótkerildi. Atap ótilgenindey, bul jerde dem alıw baǵı qurıladı, qosımsha qubır tartıp kelinedi. Kekseler sanatoriy, balalar dem alıw orınlarına jiberiledi. Mámleketimiz basshısı xalıqtıń salamatlıǵı máselesine ayrıqsha itibar qaratıp, bul jerge kelip isleytuǵın shıpakerlerge aylıq ústemeler beriw, turaq jay menen támiyinlew zárúr ekenligin atap ótti.