Ózbekstan hám Túrkiya jetekshileri kóp qırlı birge islesiwdi bunnan bılay da keńeytiw máselelerin kórip shıqtı
1482
26-fevral kúni Ózbekstan Respublikası Prezidenti Shavkat Mirziyoev Túrkiya Respublikası Prezidenti Rejep Tayyip Erdoǵan menen telefon arqalı sóylesti.
Sóylesiwdiń basında mámleketimiz basshısı Túrkiya jetekshisin tuwılǵan kúni menen shın júrekten qutlıqlap, oǵan bekkem densawlıq, baxıt-ıǵbal hám úlken tabıslar, Túrkiyanıń dos xalqına tınıshlıq-tatıwlıq hám rawajlanıw tiledi.
Sóylesiw barısında eki tárepleme kún tártibindegi áhmiyetli máseleler kórip shıǵıldı.
Ózbekstan-Túrkiya kóp qırlı birge islesiwi turaqlı hám jedel pátlerde rawajlanıp atırǵanı qanaatlanıwshılıq penen atap ótildi.
Hár qıylı dárejelerde jedel sóylesiwler dawam ettirilmekte, óz-ara sawda kórsetkishleri óspekte. Eki mámlekettiń jetekshi aymaqları menen kárxanalarınıń kooperaciyası keńeymekte, birgelikte bir qatar iri infrastrukturalıq joybarlar ámelge asırılmaqta. Áhmiyetli mádeniy-gumanitarlıq baǵdarlamalar ámelge asırılmaqta.
Mámleket basshıları Tashkent qalasında ótkeriletuǵın Strategiyalıq birge islesiw boyınsha joqarı dárejedegi keńestiń gezektegi májilisine tayarlıq kóriw máselelerine ayrıqsha itibar qarattı.
Xalıqaralıq siyasat hám regionallıq strukturalar kólemindegi birge islesiw boyınsha da pikir alısıldı.
Telefon arqalı sóylesiw har qashanǵıday doslıq hám isenim ruwxında ótti.