Ózbekstan hám Rossiya jetekshileri bir-birin qutlıqladı

Ózbekstan Respublikası Prezidenti Shavkat Mirziyoev hám Rossiya Federaciyası Prezidenti Vladimir Putin diplomatiyalıq qatnasıqlar ornatılǵanınıń 30 jıllıǵı múnásibeti menen bir-birine qutlıqlaw jolladı. Rossiya Federaciyası Prezidenti  Ullı mártebeli Mırza V.V.Putinge Húrmetli Vladimir Vladimirovich! Sizdi hám dos Rossiya xalqın Ózbekstan Respublikası hám Rossiya Federaciyası arasında diplomatiyalıq qatnasıqlar ornatılǵanınıń 30 jıllıǵı múnásibeti menen qutlıqlayman. Keyingi jılları birgeliktegi háreketlerimiz benen biz Ózbekstan-Rossiya birge islesiwin misli kórilmegen joqarı strategiyalıq sheriklik hám awqamlaslıq dárejesine alıp shıqtıq jáne xalıqlarımız arasındaǵı doslıq baylanısların jáne de bekkemledik. Búgin Ózbekstan hám Rossiya birge islesiwi ashıq-aydınlıq, óz-ara isenim hám qollap-quwatlaw, bir-biriniń máplerin húrmet etiw principleri tiykarında jedel rawajlanbaqta. Ámeliy birge islesiwimizdiń barlıq áhmiyetli baǵdarlarında tıǵız hám turaqlı qarım-qatnasta bolıw imkaniyatın beretuǵın teńsiz, nátiyjeliligin dálillegen mexanizmlerge tiykar salındı. Óz-ara sawda rekord kórsetkishlerge jetti. Keń kólemli sanaat kooperaciyası joybarları ámelge asırılmaqta. Gumanitar birge islesiw rawajlanbaqta, densawlıqtı saqlaw, ilim, mádeniyat, kórkem óner hám bilimlendiriw tarawlarındaǵı baylanıslar keńeymekte. Biz Ózbekstan hám Rossiya arasındaǵı doslıq hám kóp qırlı sheriklik qatnasıqların ellerimiz hám xalıqlarımız mápleri jolında bunnan bılay da izbe-iz rawajlandırıw hám bekkemlew niyetindemiz. Sizge bekkem densawlıq hám mámleketshilik jumısıńızǵa jańa tabıslar, dos Rossiya xalqına bolsa abadanlıq hám rawajlanıw tileymen. Tereń húrmet penen,

Shavkat Mirziyoev,

Ózbekstan Respublikası Prezidenti