Bul wazıypalardıń orınlanıwı kópshilik jaǵdayda aymaqlardaǵı ekonomikaǵa baylanıslı. Sonıń ushın, jaqında isbilermenlikti rawajlandırıw ushın 500 million dollar hám 3 trillion sumnan artıq qarjı qaratılatuǵını belgilendi. Sonıń menen birge, isbilermenlerdi eń qáweterge salıp atırǵan salıq hákimshiligi, tekseriwler, ruqsatnamalar tártibi jeńillestirildi.
Májiliste bul jumıslardı tómengi sistemada shólkemlestirip, máhállelerdi ekonomikalıq rawajlandırıw, sociallıq mashqalalardı sheshiw ilajları dodalandı.
Ózbekstan Respublikası Prezidentiniń 2021-jıl 3-dekabrdegi pármanına muwapıq, hár bir máhállede isbilermenlikti rawajlandırıw, xalıqtıń bántligin támiyinlew hám kámbaǵallıqtı qısqartıw máseleleri boyınsha rayon (qala) hákiminiń járdemshisi wazıypası shólkemlestirilgen edi. Bul – jańa sistema. Onı durıs jolǵa qoyıp alıw júdá áhmiyetli.
Sonıń ushın májiliste hákim járdemshileri jumısınıń dáslepki nátiyjeleri kórip shıǵıldı. Atap ótilgenindey, olar úsh ay dawamında 6 million 900 mıń xojalıqtı xatlawdan ótkerip, 4 kategoriyaǵa ajıratqan. Xojalıqlardıń 11 procenti az dáramatlı, 47 procenti qosımsha dáramatqa mútájligi bar, 6 procenti sociallıq qorǵawǵa mútáj, 36 procenti ózine toq shańaraqlar ekeni anıqlanǵan. Soǵan qarap, jergilikli basshılardıń jumısı mánzilli shólkemlestirilip, mıńlaǵan puqaralardıń jumısqa jaylasıwı, kásip-óner úyreniwine járdem berilgen.
Usı úsh ayda hákim járdemshileriniń baslaması menen 50 mıń shańaraqlıq isbilermenlik joybarları ushın 1 trillion 300 milliard sum kredit hám 20 milliard sum subsidiya ajıratılǵan. Nátiyjede orınlarda 47 mıń jańa isbilermenlerdiń jumısı jolǵa qoyılǵan, 8 mıń kishi sanaat hám servis joybarları iske qosılǵan.
Mámleketimiz basshısı eń jaqsı nátiyje kórsetken hákim járdemshilerin sıylıqlawǵa kórsetpe berdi.
Biraq, ele nátiyje sezilmey atırǵan máhálleler kóp. Mısal ushın, 450 máhállede jumıssızlıq dárejesi 20 procentten joqarı.
Sın kózqarasta ótkerilgen májiliste sonday aymaqlar kórsetip ótildi hám olardıń hákimleri eskertildi. Bir qatar qala hám rayon hákimleriniń orınbasarları, sektor baslıqları wazıypasınan azat etildi.
– Adamlardı razı etpegen, insan qádirin túsinbegen basshılarǵa aramızda orın joq,-dedi Shavkat Mirziyoev.
Úyreniwler dawamında «qanaatlandırarsız» dep bahalanǵan máhállelerdegi jaǵdaydı jaqsılaw boyınsha kórsetpeler berildi. Onıń ushın byudjet qárejetlerin optimallastırıw esabınan 800 milliard sum ajıratıladı.
Endi hár bir máhálle qánigelesiwi boyınsha qollap-quwatlanatuǵını atap ótildi.
Mısal ushın, 2 mıń 500 máhálle sharwashılıq, qusshılıq, balıqshılıq, pal hárreshilikke qánigelesken. Olar qosımsha qollap-quwatlanıp, istiń kózin biletuǵın adamlarǵa inkubator, úyde saqlanatuǵın tawıq, pal hárre uyaları jetkerip berilse, xalıqtıń dáramatı jáne de artadı.
Ulıwma, xojalıqlarda sharwashılıq, qusshılıq, balıqshılıq, palhárreshilik baǵdarlarda 140 mıń xalıqtıń bántligin támiyinlew múmkin ekenligi aytıldı.
Ónermentshilik, tigiwshilik, qol óneri, konditerlik sıyaqlı kishi óndirislik joybarlardı máhálleniń ózinde keńetse boladı. Prezidentimiz usı maqsette bunday máhállelerde mikro sanaat orayların shólkemlestiriw baslamasın maqulladı.
Usı jılı bul maqsetlerge 500 milliard sum qaratılatuǵını, bul oraylar 5 jıl múddetke jer hám múlk salıǵınan azat etiletuǵını belgilendi.
Sonday-aq, orınlarda anıqlanǵan bos imarat-obektlerden nátiyjeli paydalanıw, olardı satıw yamasa ijaraǵa beriwden túsken qarjılardı sol máhálleniń infrastrukturasın rawajlandırıwǵa jumsaw zárúr ekenligi atap ótildi.
Hayal-qızlar hám mayıplıǵı bar shaxslardı jumıs penen támiyinlewde qolaylı baǵdar bul – úyde jumıstı bólip alıp islew. Usı maqsette búgin Ózbekstan Prezidentiniń jumıstı úyde bólip alıp islewdi rawajlandırıw tiykarında xalıqtıń bántligin támiyinlewge baylanıslı qararına qol qoyıldı.
Endi, jumıstı úyde bólip alıp islewshiler menen isleytuǵın isbilermenlerge shańaraqlıq isbilermenlik baǵdarlamasınan 500 milliard sum qaratıladı. Kreditler boyınsha Isbilermenlik qorınan 75 procentlik kepillik beriledi jáne procent qárejetleriniń 10 procentten joqarı bólegi qaplap beriledi.
Sonday-aq, jumıstı úyde bólip alıp islewshilerge ózin-ózi bánt etken puqaralar sıyaqlı, tek ǵana sociallıq salıq tólew imkaniyatı jaratıladı, alıs aymaqta islep atırǵan jumıstı úyde bólip alıp islewshilerdiń dáslepki 1 aylıq miynet haqısı mámleket tárepinen qaplap beriledi.
Wálayat hákimlerine usı imkaniyatlardan paydalanıp, járdemge mútáj xalıqtıń bántligin támiyinlew boyınsha kórsetpeler berildi.
Elimizde 2 mıńnan aslam máhálle xızmetler tarawına qánigelesken. Bunday aymaqlardı kóbeytiw maqsetinde, xalqı 20 mıńnan asatuǵın máhállelerde usaqlap satıw sawdası hám xızmet kórsetiw orayların shólkemlestiriw zárúr ekenligi atap ótildi. Bul oraylar da 5 jıl múddetke jer hám múlk salıǵınan azat etiledi.
Videoselektor májilisinde hákimler, olardıń járdemshileri máhálle kesiminde islesiw hám xalıqtıń bántligin támiyinlew rejeleri boyınsha málimleme berdi.
