Qaraqalpaqstan Respublikası mádeniyatı kúnleri – Buxarada

Ózbekstan Respublikası Prezidentiniń usı jıl 2-fevraldaǵı «Mádeniyat hám kórkem óner tarawın jáne de rawajlandırıwǵa baylanıslı qosımsha ilajlar haqqında»ǵı Qararına muwapıq óz-ara birge islesiw principi astında óz aymaǵında jumıs alıp barıp atırǵan mádeniyat mákemeleri jámáátleriniń basqa aymaqlarǵa gastrol saparların, aymaqtıń «mádeniyat kúnleri» ilajların nátiyjeli shólkemlestiriw belgilengen edi. Mine, usı tiykarda 26-29-aprel kúnleri Buxara wálayatında Qaraqalpaqstan Respublikası mádeniyatı kúnleri bolıp ótti. Mádeniyat hám kórkem óner tarawı xızmetkerleri, shayır hám jazıwshılardan ibarat qaraqalpaqstanlı miymanlar húrmet penen kútip alındı. Qaraqalpaqstan Respublikası mádeniyatı kúnleriniń ashılıw saltanatında Qaraqalpaqstan Respublikası Joqarǵı Keńesiniń komitet baslıǵı D.Qurbaniyazov, Buxara wálayatı hákimi orınbasarı B.Shaxriyorov, Buxara qalası hákimi J.Nosirovlar shıǵıp sóylep, Buxara wálayatında Qaraqalpaqstan Respublikası mádeniyatı kúnleriniń ashılıwı menen qutlıqladı. Qaraqalpaqstan Respublikası mádeniyatı kúnleri Buxara wálayatınıń qala hám rayonlarında dawam etti.