Eń ullı, eń áziz bayram múnásip belgilendi

Ózbekstan Respublikası ǵárezsizliginiń 28 jıllıǵına baǵıshlanıp paytaxtımızdaǵı Ashıq teatrda bolıp ótken «Janajan Ózbekstanım, máńgi bol aman!» atamasındaǵı teatrlastırılǵan ádebiy muzıkalı-xoreografiyalıq bayram saltanatınan reportaj Prezidentimizdiń basshılıǵında elimizde tınıshlıq hám turaqlılıqtı bekkemlew, insan huqıqları, erkinlikleri hám máplerin támiyinlew, Watanımızdı hár tárepleme rawajlandırıw, onıń xalıqaralıq maydandaǵı abıray-mártebesin arttırıw baǵdarında keń kólemli reformalar ámelge asırılmaqta. Atap aytqanda, «Jedel investiciyalar hám sociallıq rawajlanıw jılı» mámleketlik baǵdarlaması, «Abat awıl», «Abat máhálle», «Hár bir shańaraq – isbilermen», «Jaslar – keleshegimiz», «Bes unamlı baslama» sıyaqlı áhmiyetli baǵdarlamalar hám rejeler sheńberinde qala hám rayon oraylarında, hátteki, shetki awıllarımızǵa shekem qurılıs jáne dóretiwshilik jumısları alıp barıldı. Sonıń menen birge, xalqımızdıń turmıs dárejesin jaqsılaw, kishi biznes hám jeke isbilermenlikti rawajlandırıw,  jaslar, hayal-qızlar, kekse áwlad wákilleri, sociallıq qorǵawǵa mútáj insanlarǵa ǵamqorlıq kórsetiwge  ayrıqsha itibar qaratılmaqta. Ózbekstan Respublikası Prezidentiniń usı jıl 8-iyul kúngi «Ózbekstan Respublikası mámleketlik ǵárezsizliginiń jigirma segiz jıllıq bayramına tayarlıq kóriw hám onı ótkeriw haqqında»ǵı arnawlı qararı tiykarında respublikamız boylap keń kólemli tayarlıq jumısları alıp barıldı.  Bıyılǵı jılǵı bayramnıń «Janajan Ózbekstanım, máńgi bol aman!» súreni astında ótkeriliwinde de tereń máni bar. Hár jıldaǵıday, bıyılǵı jılı da bayram aldınan bir qatar óndirislik, sociallıq-mádeniy obektler xalqımızdıń iygiligi ushın paydalanıwǵa tapsırıldı. 2019-jıl, 29-avgust. Paytaxtımızdaǵı Ashıq teatr, onıń átirapı elimiz ǵárezsizligin, miynetkesh xalqımızdı, xalıqlar doslıǵın ulıǵlawshı shaqırıq-súrenler, insanǵa zawıq baǵıshlaytuǵan ráńbáreń gúller, túrli reńdegi jaqtılandırıwshı shıraqlar menen bezelgen. Saat 19.30. Shaqırıq sazı menen bayram saltanatı baslanıp, sóz Qaraqalpaqstan Respublikası Joqarǵı Keńesiniń Baslıǵı, Ózbekstan Qaharmanı M.Erniyazovqa berildi. Respublikamız basshısı jıynalǵanlardı, gúllán xalqımızdı elimiz ǵárezsizliginiń 28 jıllıq bayramı menen qızǵın qutlıqladı. Atap ótilgenindey,  búgingi kúni elimizdiń barlıq jerleri sıyaqlı respublikamızdıń qala hám rayonları jańasha shıray ashıp, úlken dóretiwshilik maydanına aylanıp barmaqta. Sonıń nátiyjesinde birinshi yarım jıllıqta jalpı aymaqlıq ónimlerdiń kólemi  7 trillion sumdı quraǵan bolsa, jıl aqırına shekem  bul kórsetkish 15 trillion sumǵa jetiwi kútilmekte. Ótken altı ay dawamında qurılıs jumıslarınıń kólemi 45 procentke, investiciyalardıń kólemi 19,4 procentke, tutınıw tovarların islep shıǵarıw kólemi 8,4 procentke,  awıl xojalıǵı ónimlerin jetistiriw kólemi 5,4 procentke, xızmetler kólemi 18 procentke óskeni-ekonomikamızdıń tez pátler menen rawajlanıp atırǵanın dálilleydi. Usı jıldıń 20-21-avgust kúnleri  Prezidentimizdiń respublikamızǵa bolǵan saparı, sonday-aq Nókis qalasında xalqımız benen bolǵan ushırasıwı úlken tariyxıy waqıyalardı, quwanıshlı máwritlerdi, rawajlanıwımızdıń jańa basqıshın ózinde jámleydi. Bolıp ótken ushırasıwlarda elimizdiń basshısı  respublikamızdı rawajlandırıwda bes tiykarǵı wazıypanı belgilep berdi. Xalqımızdıń ótinish tileklerinen kelip shıǵıp, 2019-2022- jıllarda jámi 14 trillion 684 milliard sumlıq 697 joybardı ámelge asırıw, sonıń esabınan 14 mıńǵa shamalas jańa jumıs ornın jaratıw wazıypaları belgilep alındı. Sonıń ishinde, sırt el investiciyalarınıń úlesi 914  million 735 mıń AQSh dolların quraydı. Bayram aldınan bir qatar zamanlaslarımız orden hám medallar, mámleketlik ataqlar alıwǵa miyasar boldı. Ásirese, Qaraqalpaqstan Respublikası Joqarǵı Keńesiniń Baslıǵı M.Erniyazovqa elimizdiń eń joqarı sıylıǵı-Ózbekstan Qaharmanı ataǵınıń beriliwi Prezidentimizdiń xalqımızǵa bolǵan joqarı húrmet hám ǵamqorlıǵınıń ayqın kórinisi boldı. Bul quwanıshlı xabardı bayram qatnasıwshıları uzaq dawam etken qol shappatlawlar menen qarsı aldı. Bunnan soń Ózbekstan hám Qaraqalpaqstan Respublikalarınıń mámleketlik gimnleri jańladı. Bul jerde ornatılǵan monitor arqalı kórsetilgen Prezidentimizdiń basshılıǵında ǵárezsizlik jıllarında qolǵa kirgizilgen tabıslar, respublikamızda, sonıń ishinde, Moynaq rayonında búgingi kúngi ámelge asırılıp atırǵan keń kólemli qurılıs jumısları  hár bir qatnasıwshıda ayrıqsha quwanısh jáne maqtanısh sezimlerin payda etti. Bayram tamashaları Ózbekstan hám Qaraqalpaqstan Respublikalarına xızmet kórsetken artist, «Nihol» sıylıǵınıń iyesi Maqset Ótemuratovtıń atqarıwındaǵı «Tuwǵan jer» qosıǵı menen baslandı. Bunnan keyin Watan, tuwılǵan jer, ǵárezsizlik haqqındaǵı qosıqlar menen ayaq oyınlar atqarıldı. Búgingi kúni elimizde jaslardı hár tárepleme qollap-quwatlaw, olardıń qábiletlerin júzege shıǵarıwları ushın barlıq sharayat jaratılǵan. Bular Nókis qalasındaǵı 1-sanlı, 12-sanlı, 22-sanlı balalar muzıka hám kórkem óner mektepleri oqıwshılarınıń, Nókis qalalıq mádeniyat bólimi janındaǵı «Náwshe» úlgili balalar estrada ansambli, Jaslar orayı janındaǵı «Shuǵla» hám «Juldızsha» ansamblleri aǵzalarınıń atqarıwındaǵı «Bes baslama-bes imkaniyat» kompoziciyasında jáne bir márte óz kórinisin taptı. Elimizde denetárbiya hám sporttı rawajlandırıwǵa ayrıqsha áhmiyet berilmekte. Búgingi kúni sportshılarımız kelesi jılı Yaponiyada bolıp ótetuǵın XXXII jazǵı Olimpiada oyınlarına licenziya alıw ushın xalıqaralıq jarıslarǵa múnásip qatnasıp atır. Bunda olarǵa áwmet tileymiz. Bayram tamashasınıń sport bóliminde  kelesheginen úmit kúttiretuǵın jas sportshılardıń kórgizbeli shıǵıwı boldı. Elimizdiń aymaqlıq pútinligin, shegeralarımızdıń tınıshlıǵın, xalqımızdıń abadan turmısın támiyinlewde Qurallı Kúshlerimiz xalqımızdıń haqıyqıy qorǵanına aylanbaqta.. Bayram tamashasında Arqa-Batıs  áskeriy okrugi áskerleriniń saltanatlı shıǵıwı, olar tárepinen Watan súyiwshilik sezimlerin jırlawshı qosıqlar jıynalǵanlarda ayrıqsha tásir qaldırdı. Respublikamızda túrli millet wákilleri bir shańaraq aǵzalarınday bekkem awızbirshilikte jasap hám miynet etip kelmekte. Ilajda túrkmen, rus xalıqlarınıń milliy qosıqları sheberlik penen atqarıldı. Bayram tamashası «Gúllengen Ózbekstan» kórkem kompaziciyası menen juwmaqlandı. Ózbekstan Respublikası ǵárezsizliginiń 28 jıllıǵına baǵıshlanǵan bunday ilajlar, xalıq seyilleri respublikamızdıń barlıq rayonları hám awılları boylap dawam etpekte.