Mikroqarızlardıń eń joqarı muǵdarı 100 million sumǵa shekem arttırıladı

«Isbilermenlik jumısın rawajlandırıwda mikrofinanslıq xızmetlerdiń ornı hám úlesin arttırıw boyınsha qosımsha ilajlar haqqında»ǵı Prezident qararı (PQ-364-sanlı, 10.11.2023 j.) qabıl etildi. Qararǵa bola, 2024-2026-jıllarda tómendegi maqsetli kórsetkishlerge erisiwge qaratılǵan mikrofinanslıq xızmetlerdiń qolaylıǵın arttırıw baǵdarlaması ámelge asırıladı: – mikroqarjılandırıw bazarınıń kólemi keminde 5 esege shekem arttırıw; – mikrofinaslıq xızmetler menen 1 millionnan aslam isbilermenlerdi qamtıp alıw; – mikroqarjı shólkemleriniń resurs bazasında fizikalıq táreplerden tartılatuǵın qarjılar muǵdarın 2 esege arttırıw; – mikrofinanslıq xızmetler kórsetiw arqalı rásmiy dáramatqa iye bolmaǵan 500 mıńǵa shamalas shaxslardı ózin-ózi bánt etiw hám biznesti rawajlandırıwǵa járdemlesiw. 2024-jıl 1-yanvardan: – mikroqarızdıń eń joqarı muǵdarı 50 million sumnan 100 million sumǵa shekem arttırıladı; – bank emes kredit shólkemlerdiń akcionerlik jámiyeti yamasa juwapkershiligi sheklengen jámiyet túrinde shólkemlestiriledi; – mikroqarjı shólkemlerine rezidentlerden emes sırt el valyutasında qarız qarjıların tartıw hám yuridikalıq táreplerge sırt el valyutasında finanslıq xızmetler kórsetiwge ruxsat beriledi; – fizikalıq tárep bolǵan qatnasıwshılardan (akcionerlerden) ustav fondına (ustav kapitalına) kirgizilge úles summasınıń yamasa olardıń iyeligindegi akciyalar nominal bahasınıń eki esesinen artpaytuǵın muǵdarda qarız qarjıların tartıwǵa ruxsat etiledi; – mikroqarjı shólkemleri tiyisli licenziya alǵan halda tólem shólkeminiń jumısın ámelge asırıw huqıqına iye boladı; – fizikalıq hám yuridikalıq tárepler bank emes kredit shólkeminiń ustav kapitalındaǵı úleske iyelik etiw ushın Oraylıq bank dáslepki ruxsatın alıw talabı nızamshılıqta belgilengen 10 procentlik úlesin 20 procentke arttırıw arqalı jumsartıladı. Onda alınıp atırǵan úles muǵdarı 10 procentten 20 procentke shekem Oraylıq bankin xabardar etiw tártibi engiziledi; – mikroqarjı shólkemlerine kommerciyalıq banklerden kredit resursları tartılǵanda yamasa isbilermenlik subektlerine mikroqarjı shólkemlerinen mikrokredit alınǵanda «Isbilermenlikti rawajlandırıw kompaniyası» AJ kepilligin beriw imkaniyatı jaratıladı; – kommerciyalıq banklerge mikroqarjı shólkemlerine kredit ajıratıwda olardıń kórsetilgen mikrofinanslıq xızmetler boyınsha talap etip alıw huqıqın girewge alıw huqıqı beriledi. 2024-jıl 1-aprelge shekem mikroqarjı xızmetleri tarawına qánigelesken jańa mikroqarjı shólkemi shólkemlestiriledi. 2024-jıl 1-yanvarǵa shekem mirkoqarjı shólkemleri tárepinen islamiy qarjılandırıwǵa baylanıslı xızmetler kórsetiwdiń normativlik-huqıqıy bazası islep shıǵıladı.

Qaraqalpaqstan xabar agentligi