ÓzA
Ózbekstan Prezidentiniń «Aǵartıwshılıq hám diniy keńpeyillik» arnawlı rezolyuciyasın qabıllaw baslaması xalıqaralıq maydanda tán alınbaqta
950
Mámleketimizde Prezidentimiz Shavkat Mirziyoevtiń basshılıǵında aǵartıwshılıq hám diniy keńpeyillik máselelerine ayrıqsha itibar berilmekte. Keyingi jeti jılda taraw boyınsha 50 den artıq nızam hújjeti qabıl etildi.
Ózbekstannıń milletleraralıq hám konfessiyalararalıq tatıwlıqtı ornatıw siyasatı Insan huqıqları ulıwma jer júzilik deklaraciyası hám basqa da xalıqaralıq huqıqıy-normativlik hújjetlerge tolıq sáykes keledi.
Bul pikirler Oliy Majlis Senatınıń Baslıǵı Tanzila Norboevanıń Musılman aqsaqallar keńesiniń bas xatkeri Muhammad Abdusalam menen sóylesiwinde atap ótildi.
Ushırasıwda Musılman aqsaqallar keńesi menen keń kólemli baylanıslardı bekkemlew, diniy keńpeyillik hám dástúriy islam qádiriyatların bekkemlew baǵdarında birge islesiwdi keńeytiw máseleleri dodalandı.
Elimizde hár qıylı millet hám din wákilleriniń óz potencialın tolıq ámelge asırıwı, olardıń huqıq hám máplerin qorǵaw ushın konstituciyalıq kepillikler támiyinlengen. Ózbekstan musılmanları basqarması, onıń aymaqlardaǵı wákillikleri, 3 joqarı hám 10 orta arnawlı bilimlendiriw mákemesi hám 16 konfessiyaǵa tiyisli 2,3 mıńnan artıq diniy shólkem jumıs alıp barmaqta.
Muhammad Abdusalam Ózbekstan Prezidentiniń BMSh Bas Assambleyasınıń «Aǵartıwshılıq hám diniy keńpeyillik» arnawlı rezolyuciyasın qabıl etiw baslaması xalıqaralıq maydanda da tán alınıp atırǵanı, hújjet usı baǵdardaǵı háreketlerdi birlestiriwge túrtki bolǵanına ayrıqsha toqtap ótti.
Ózbekstannıń pútkil dúnya musılmanları ushın júdá úlken áhmiyetke iye ekeni, usı elden jetisip shıqqan ulamalar tek ǵana musılman álemine emes, al pútkil dúnya ushın da ilimiy miyras qaldırǵanı atap ótildi.
Ushırasıw sońında óz-ara baylanıslardı jáne de keńeytiw, delegaciyalar saparların ámelge asırıw, birgelikte hár qıylı ilimiy hám ámeliy ilajlardı shólkemlestiriwge kelisip alındı.