JAMPIQ QALA

Jampıq qala Sultan Wáyis tawınıń túslik-batıs tárepinde jaylasqan. Ol Ámiwdáryanıń oń jaǵasındaǵı eń sulıw esteliklerden biri esaplanadı. Jobası boyınsha ol quramalı konfiguraсiyaǵa iye. Onıń shıǵıs tárepinde tuwrımúyeshli qorǵan saqlanıp qalǵan. Qorǵannıń paqsa diywalları tóbesi juplasqan basqıshlı arkalar menen tamamlanatuǵın, birikken yarım óreler menen bezelgen. Eń dáslepki qurılmalar b.e.sh. IV á. – b.e. I ásirlerde boy tiklegen, biraq ta búgin kóriwge bolatuǵın diywallar b.e. IX ásirden – X ásirlerge shekem salınǵan. Qalashada tawılǵan teńgeler bul jerde adamlardıń jasaǵan sońǵı waqtı — b.e. XII–XIV ásirler, dep belgilewge múmkinshilik beredi. Orta ásirlerde Jampıq qala port qalası xızmetin atqarǵan. Arxeologiyalıq qazıw ótkerilgende, usı jerden bunnan aldın Shıǵıs hám Batıstıń (Qıtay, Egipet, Evropa, Indiya) hár qıylı qalalarınan alıp kelingen kóp sandaǵı zatlar tawılǵan.