Qaraqalpaqstan Respublikası Joqarǵı Keńesiniń 50-sessiyası haqqında málimleme
Qaraqalpaqstan Respublikası Joqarǵı Keńesiniń gezeksiz eliwinshi sessiyası bolıp ótti. Sessiyaǵa Ózbekstan Respublikası Oliy Majlisi Senatı hám Húkimet aǵzaları, Respublika sektor hám taraw basshıları, ǵalaba xabar quralları wákilleri, sonday-aq, Joqarǵı Keńestiń deputatları qatnastı. 
Bunnan soń ámelge asırılıp atırǵan jumıslar boyınsha Qaraqalpaqstan Respublikası prokurorı, 2-sektor basshısı E.Tadjiev bayanat jasadı. 
Aytıp ótiw orınlı, Qaraqalpaqstan Respublikası prokuraturası uyımları tárepinen mámleketimiz basshısı tárepinen alǵa súrilgen «Insan qádiri ushın» normaları hám nızam ústemligin ámelde támiyinlew boyınsha bir qatar salmaqlı jumıslar ámelge asırılǵanı atap ótildi. Kún tártibindegi másele boyınsha Qaraqalpaqstan Respublikası Ishki isler ministri, 3-sektor basshısı B.Torebekov bayanat jasadı. 
Respublikanıń 3-sektorına Taxtakópir, Qaraózek, Shımbay, Bozataw hám Kegeyli rayonları biriktirilgen bolıp, usı jılda 3-sektor aymaǵındaǵı 5 rayonda miynet bazarına kirip keliwshi jámi 22 mıń 122 puqara bántligi támiyinleniwi lazım bolǵan puqaralar bolıp, sonnan ulıwma bilim beriw mektebiniń 2 mıń 918 pitkeriwshileri, 9 mıń 816 migraciyadan qaytıp keletuǵınlar, 9 mıń 388 jumıssız shaxslardı quraydı. Ótken 1-sherek dawamında 3 mıń 467 jańa jumıs orınları jaratılıp, belgilengen reje 136,9 % orınlandı. Xalıqtı isbilermenlikke qamtıw, bántiligin támiyinlew hám kásipke oqıtıw maqsetinde de bir qatar jumıslar ámelge asırıldı. Prezidentimizdiń baslaması menen «Abat shańaraq, abat kóshe, abat mahálle» baǵdarlaması tiykarında da salmaqlı jumıslar ámelge asırılmaqta. Sonday-aq, aymaqlarda jasawshı awır jaǵdayǵa túsip qalǵan shańaraklardı qollap-kuwatlaw boyınsha da jumıslar dawam ettirilmekte. 
Bunnan soń Qaraqalpaqstan Respublikası Mámleketlik Salıq basqarması baslıǵı, 4-sektor basshısı X.Bekchanov bayanat jasadı. Aytıp ótiw orınlı, Prezidentimizdiń baslaması menen xalıqtıń bántligin támiyinlew, olardıń mashqalalarına sheshim tabıw hámde olarǵa qolaylı sharayatlar jaratıw boyınsha bir qatar jumıslar ámelge asırılmaqta. Respublikanıń 4-sektorına Nókis qalası, Xojeli, Taqıyatas hám Nókis rayonları biriktirilgen. Salıq uyımları tárepinen «máhálle jetiligi» jumısınıń nátiyjeliligin arttırıw maqsetinde Qaraqalpaqstan Respublikasındaǵı 452 máhállege 220 salıq xızmetkeri biriktirilip, jumıslar sistemalı dawam ettirilip atırǵanlıǵı atap ótildi. Kún tártibindegi dáslepki másele boyınsha deputatlar tárepinen qarar qabıl etildi. 
Kún tártibindegi keyingi másele múrájatlar menen islesiw jaǵdayı boyınsha ámelge asırılıp atırǵan jumıslar haqqında bolıp, bul másele boyınsha Ózbekstan Respublikası Prezidentiniń Qaraqalpaqstan Respublikasındaǵı Xalıq qabıllawxanası baslıǵı S.Xudaybergenov bayanat jasadı. Búgingi kúnge shekem Prezident Virtual hámde Xalıq qabıllawxanalarına puqaralardan kelip túsken múrájatlardıń kópshiligi óziniń unamlı sheshimin tawıp atır. Bunda múrájatlardıń unamlı sheshiliw dárejesiniń kóteriliwiniń tiykarǵı sebepleriniń biri Joqarǵı Keńeste shólkemlestirilgen múrájatlar platforması, Ministrler Keńesindegi Arnawlı shtab jumısı, sonıń menen bir qatarda, ministrlikler hámde sektor basshıları tárepinen orınlarda puqaralar menen turaqlı túrde ushırasıwlar ótkerilip atırǵanlıǵı sebepli, kópshilik múrájatlar óziniń unamlı sheshimin tappaqta. Kún tártibindegi másele deputatlar tárepinen tolıq qarap shıǵıldı hám arnawlı qarar qabıl etildi. Kún tártibinde jáne bir áhmiyetli bolǵan Qaraqalpaqstan Respublikası Oraylıq saylaw komissiyasınıń jańa quramın dúziw tuwralı másele qarap shıǵıldı. 
«Saylaw haqqında»ǵı Qaraqalpaqstan Respublikası Nızamınıń 12-statyasına muwapıq Xalıq deputatları qalalıq hám rayonlıq Keńesleri tárepinen Qaraqalpaqstan Respublikası Oraylıq saylaw komissiyası aǵzalıǵına 21 adam quramında talabanlar usınıldı hám deputatlar tárepinen maqullandı. Deputatlar tárepinen bul másele boyınsha da arnawlı qarar qabıl etildi. Sessiyanıń kún tártibindegi sońǵı másele Qaraqalpaqstan Respublikası Joqarǵı Keńesi Prezidiumınıń tiyisli qararların tastıyıqlaw haqqında bolıp, deputatlar bul másele boyınsha da tiyisli qarar qabıl etti. Usınıń menen Qaraqalpaqstan Respublikası Joqarǵı Keńesiniń gezeksiz eliwinshi sessiyası óz jumısın juwmaqladı.