Qaraqalpaqstan Respublikası Joqarǵı Keńesiniń 52-sessiyası haqqında málimleme

Qaraqalpaqstan Respublikası Joqarǵı Keńesiniń eliw ekinshi sessiyası bolıp ótti. Sessiyaǵa Ózbekstan Respublikası Oliy Majlisi Senatı hám Húkimet aǵzaları, Respublika sektor hám taraw basshıları, ǵalaba xabar quralları wákilleri, sonday-aq, Joqarǵı Keńestiń deputatları qatnastı. Sessiyanı Qaraqalpaqstan Respublikası Joqarǵı Keńesiniń Baslıǵı Amanbay Orınbaev kiris sóz benen ashtı hám basqarıp bardı. Sessiya «Qaraqalpaqstan» telekanalı arqalı tuwrıdan-tuwrı efirde jarıtıp barıldı. Sessiyanıń kún tártibindegi dáslepki másele «Qaraqalpaqstan Respublikasınıń ayırım nızamlarına ózgerisler hám qosımshalar kirgiziw haqqında»ǵı Qaraqalpaqstan Respublikası Nızamınıń joybarı boyınsha bolıp, bul másele boyınsha Joqarǵı Keńestiń komitet baslıǵı Zuxra Reymova bayanat jasadı. Sessiyanıń kún tártibindegi dáslepki másele boyınsha qarar qabıl etildi. Kún tártibindegi keyingi másele Qaraqalpaqstan Respublikası Qurılıs hám úy-jay kommunal xojalıǵı Ministriniń esabatı tuwralı bolıp, bul másele boyınsha Qurılıs hám úy-jay kommunal xojalıǵı Ministri Q.Aytbaev bayanat jasadı. Qaraqalpaqstanda 2024-jılda sociallıq-ekonomikalıq rawajlandırıwdıń reyting bahalaw kórsetkishleri, ámeliy rejeleri hámde bul baǵdarda anıqlanǵan mashqalalardı saplastırıw boyınsha bir qatar jumıslar ámelge asırılıp kelinbekte. Ministrlik, onıń qala hám rayonlıq bólimleri, ministrlik quramındaǵı kárxanalar tárepinen 2024-2025-jıllar dawamında kóp kvartiralı úy-jay fondın saqlaw, olardıń texnikalıq jaǵdayların montoring etiw, sonıń ishinde, úy-jay fondın iri hám jeńil ońlaw, úy-jaylardı basqarıw uyımlarınıń jumısların muwapıqlastırıw, ıssılıq támiynatı sistemaların rawajlandırıw boyınsha jumıslar dawam ettirilmekte. Respublikamızdıń qala hám rayonları aymaqlarında jámi 1634 kóp kvartiralı turaq jaylar bar bolıp, sonnan, 1156 jayǵa 31 basqarıw shólkemleri hám 91 jayǵa 10 turaq-jay iyeleri sheriklikleri xızmet kórsetip kelmekte. Usı jıl dawamında kóp kvartiralı turaq jaylarǵa xızmet kórsetiwshi basqarıw shólkemleriniń 931,3 mln. sumlıq májbúriy tólemleri esabınan 86 kóp kvartiralı turaq jaylarǵa jeńil ońlaw jumısları ámelge asırıldı. Búgingi kúnde basqarıw shólkemlerine biriktirilgen kóp kvartiralı turaq jay múlkdarları menen shártnama dúziw jumısları 96 payızǵa orınlandı hám shártnama dúziw jumısları dawam etpekte. Basqarıw shólkemleriniń usı kúnge deyin jámi 5,9 mlrd. sumlıq májbúriy tólemleri óndirildi. Respublikamız aymaǵında jaylasqan 1634 kóp kvartiralı turaq jaylardan 18344 kvartiralı 541 turaq jay oraylasqan ıssılıq támiynatı hám eki konturlı zamanagóy qazanlar menen támiyinlengen. Qalǵan 15306 kvartiralı 427 kóp kvartiralı turaq jaylar zamanagóy eki konturlı ısıtıw qazanlarınan paydalanıp kelmekte. Sessiyada búgingi kúnde respublikamız aymaǵında 27,2 km. ıssılıq tarmaqlarınan ibarat saz jaǵdaydaǵı 3 qazanxana xalıqqa xızmet kórsetip atırǵanı atap ótildi. Kún tártibindegi bul másele de tolıq qarap shıǵıldı hám deputatlar tárepinen qarar qabıl etildi. Kún tártibindegi keyingi másele Qaraqalpaqstan Respublikasında turizmdi rawajlandırıw boyınsha 2024-jıl dawamında ámelge asırılǵan ilajlar haqqında Qaraqalpaqstan Respublikası Turizm basqarmasınıń esabatı tuwralı bolıp, bul másele boyınsha basqarma baslıǵı G.Izentaeva bayanat jasadı. 2021-jılı aymaqta 27 jaylastırıw ornı, 44 turoperator jumıs alıp barǵan bolsa, búgingi kúnge kelip 111 jaylastırıw ornı, 74 turoperatorlıq subekti, arnawlı transportlar jergilikli hám sırt elli turistlerge xızmet kórsetpekte. Sońǵı jıllarda elimizge kelip atırǵan sırt elli turistlerdiń joqarı ósiw dinamikası baqlanbaqta. Atap aytqanda, Qaraqalpaqstanǵa 2021-jılı 287 mıń jergilikli, 24 mıń sırt elli turistler kelgen bolsa, 2024-jıl basınan berli 1 mln. 914 mıń jergilikli hám 190 mıńǵa jaqın sırt elli turistler keldi. Ótken 9 ay juwmaǵı boyınsha turizm xızmetleri eksportı kólemi 27,53 mln. AQSh dollardı quradı. 2024-jılı Qaraqalpaqstanda turizm tarawı boyınsha ulıwma muǵdarı 149,3 mlrd. swmlıq 36 investiciyalıq joybardıń ámelge asırılıwı rejelestirilgen bolıp, bunıń nátiyjesinde 209 jańa jumıs ornınıń jaratılıwı názerde tutılǵan. Joqarıdaǵılar menen bir qatarda, turizm tarawın rawajlandırıw, taraw wákillerin qollap-quwatlaw hám aymaqtıń turistlik potencialın keńnen úgit-násiyatlaw maqsetinde «DMO Karakalpakstan» jámiyetlik birlespesi hám Turizm komiteti janındaǵı «Milliy PR» MUKtıń Qaraqalpaqstan Respublikası filialı shólkemlestirildi. Húrmetli Prezidentimizdiń xalqımızǵa degen ayrıqsha ǵamxorlıǵı nátiyjesinde bıyılǵı jılı tarawda tariyxıy waqıyalar júz berdi. Atap aytqanda, tarawdı rawajlandırıw baǵdarında bir qatar jeńillikler berildi. «Nókis–Moynaq–Nókis» baǵdarı boyınsha ishki aviareysler, «Nókis–Almatı–Nókis», «Nókis–Stambul–Nókis» jónelisi boyınsha xalıqaralıq aviareysler, sonday-aq, Qazaqstan Respublikasınıń Mańǵıstaw wálayatı, Aqtaw qalasına «Nókis– Mańǵıstaw–Nókis» jónelisinde jolawshı poezdlarınıń qatnawı jolǵa qoyıldı. Sessiyada, usı jıldıń juwmaǵına aymaǵımızǵa ishki turistler sanın 2 mln.ǵa, sırt elli turistler sanın 200 mıńǵa, turizm eksportı kólemi 30 million dollarǵa hámde jaylastırıw orınların 113 ke jetkeriw rejelestirilgeni atap ótildi. Deputatlar tárepinen bul másele de tolıq qarap shıǵıldı hám qarar qabıl etildi. Kún tártibindegi keyingi másele boyınsha awıl xojalıǵı tarawında diyqan hám fermerler ushın barlıq qolaylı shárayatlar jaratıw, olardıń materiallıq texnikalıq bazasın jıldan-jılǵa jaqsılap barıw, ushırasıp atırǵan mashqalaların sheshiwde basshı kadrlardıń ornı áhmiyetli ekenligi atap ótildi hám Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı lawazımına Teshaev Shuhrat Jwraqulovich tayınlandı. Sh.Teshaev bunnan aldın Ózbekstan fermer, diyqan xojalıqları hám qıytaq jer iyeleri keńesi baslıǵınıń birinshi orınbasarı lawazımında jumıs alıp barǵan. Sonday-aq, miynet jolı dawamında Ózbekstan Respublikası awıl háam suw xojalıǵı ministriniń agrotexnologiya máseleleri boyınsha birinshi orınbasarı, Ózbekstan Respublikası awıl hám suw xojalıǵı ministri sıyaqlı sıyaqlı juwapkershilikli lawazımlardı tabıslı atqarǵan. Sessiyada Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı lawazımında jumıs alıp barǵan Kaypov Daryabay Jaksıbaevich Qaraqalpaqstan Respublikası awıl xojalıǵı ministri lawazımına tayınlanǵanı atap ótildi. Sessiya májilisiniń kún tártibindegi keyingi másele Joqarǵı Keńes Prezidiumınıń tiyisli qararların tastıyıqlaw máselesi haqqında bolıp, bul másele de tolıq qarap shıǵıldı. Kún tártibindegi másele boyınsha deputatlar tárepinen qarar qabıl etildi. Usınıń menen Qaraqalpaqstan Respublikası Joqarǵı Keńesiniń eliw ekinshi sessiyası óz jumısın juwmaqladı.