Qaraqalpaqstan Respublikası Joqarǵı Keńesiniń tórtinshi sessiyası haqqında málimleme
Usı jıldıń 29-aprel kúni Qaraqalpaqstan Respublikası Joqarǵı Keńesiniń tórtinshi sessiyası bolıp ótti. Sessiyaǵa Ózbekstan Respublikası Oliy Majlisi Senatı hám Húkimet aǵzaları, Respublika hám taraw basshıları, ǵalaba xabar quralları wákilleri, sonday-aq, Joqarǵı Keńestiń deputatları qatnastı. Sessiyanı Qaraqalpaqstan Respublikası Joqarǵı Keńesiniń Baslıǵı Amanbay Orınbaev kiris sóz benen ashtı hám basqarıp bardı. Sessiya kún tártibindegi dáslepki másele «Qaraqalpaqstan Respublikasınıń ayırım nızamlarına ózgerisler hám qosımshalar kirgiziw haqqında»ǵı Qaraqalpaqstan Respublikası Nızamınıń joybarı tuwralı bolıp, bul másele boyınsha Joqarǵı Keńestiń Jergilikli hákimiyattıń wákillikli hám puqaralardıń ózin-ózi basqarıw uyımları hám de mámleketlik uyımlardıń ashıqlıǵın támiyinlew máseleleri komiteti baslıǵı Sh.Otemisov bayanat jasadı.
Bul Nızam 5 statyadan ibarat bolıp, Qaraqalpaqstan Respublikasınıń 2013-jıl 5-iyuldaǵı «Puqaralardıń ózin-ózi basqarıw uyımları haqqında»ǵı hám Qaraqalpaqstan Respublikasınıń 2019-jıl 27-marttaǵı «Puqaralar jıyını baslıǵın saylaw haqqında»ǵı Nızamlarına ózgeris hám qosımshalar kirgizilmekte. Kún tártibindegi dáslepki másele tolıq qarap shıǵıldı hám deputatlar tárepinen qarar qabıl etildi.
Kún tártibindegi keyingi másele Qaraqalpaqstan Respublikası Joqarǵı Keńesiniń Sanaat, qurılıs, transport hám málimleme texnologiyaları máseleleri komiteti tárepinen islenip atırǵan jumıslar haqqında Joqarǵı Keńestiń Sanaat, qurılıs, transport hám málimleme texnologiyaları máseleleri komitetiniń málimlemesi tuwralı bolıp, bul másele boyınsha komitet baslıǵı I.Sdikov bayanat jasadı. Atap ótilgenindey, komitet tárepinen búgingi kúnge shekem sanaat, qurılıs, transport hám energetika tarawın rawajlandırıw, qayta tikleniwshi energiya dereklerinen paydalanıwdı keńnen en jaydırıw, «jasıl energiya» úlesin arttırıw baǵdarında xalıqtı qıynap atırǵan máselelerdi sheshiw boyınsha bir qansha jumıslar ámelge asırıldı. Sonday-aq, húrmetli Prezidentimiz tárepinen qabıl etilgen qararlar, belgilep berilgen wazıypalardıń orınlanıwın támiyinlew ilajları kórilip, bul jumıslar ele de dawam ettirilmekte. Sonıń menen birge, tiyisli Prezidium qararları qabıl etildi. Komitetke aǵza deputatlar tárepinen aymaqlarda xalıqtı qıynap kiyatırǵan máseleler boyınsha ministrlik, mákeme hám shólkemlerge deputatlıq sorawlar jiberilip, mashqalalarǵa unamlı sheshim tabıw ilajları kórildi. Bunnan soń kún tártibindegi másele tolıq qarap shıǵılıp, deputatlar tárepinen arnawlı qarar qabıl etildi.
Kún tártibindegi keyingi másele Jaslardı ilim-pánge kızıqtırıw hám ilimiy jumısqa tartıw boyınsha bilimlendiriw mákemelerinde alıp barılıp atırǵan jumıslar haqqında Qaraqalpaqstan Respublikası Ministrler Keńesi Baslıǵı orınbasarınıń esabatı tuwralı bolıp, bul másele boyınsha Ministrler Keńesi Baslıǵınıń orınbasarı B.Otemuratov bayanat jasadı. Bul másele de tolıq qarap shıǵıldı hám deputatlar tárepinen qarar qabıl etildi. Sessiya májilisiniń kún tártibindegi keyingi másele Joqarǵı Keńes Prezidiumınıń tiyisli qararların tastıyıqlaw máselesi haqqında bolıp, bul másele de tolıq qarap shıǵıldı. Kún tártibindegi másele boyınsha deputatlar tárepinen qarar qabıl etildi. Usınıń menen Qaraqalpaqstan Respublikası Joqarǵı Keńesiniń tórtinshi sessiyası óz jumısın juwmaqladı.