Xalıqaralıq xirurgiyalıq toparı Aralboyı regionında 300 járdemge mútáj nawqasqa biypul operaciyalar ótkeredi

Usı kúnlerde Densawlıqtı saqlaw ministrligi tárepinen elimiz boylap «Sawallandırıw aylıǵı» ótkerilmekte.

Onıń sheńberinde sociallıq qorǵawǵa mútáj, kámbaǵallıq reestrine kirgizilgen xalıq arasında keselliklerdi erte anıqlaw hám nawqaslardı jasaw aymaǵınıń ózinde mámleket esabınan sawallandırıw ilajları kórilmekte.

Bul akciyada Kuveyt mámleketiniń «Al-amal» xalıqaralıq xirurgiyalıq toparı da óziniń gumanitarlıq missiyası menen qatnaspaqta. Bul - eki mámleket basshıları tárepinen jolǵa qoyılǵan hám barǵan sayın bekkemlenip atırǵan óz-ara doslıq birge islesiw baylanıslarınıń ámeliy nátiyjesi bolıp esaplanadı.

Elimizge kelgen 40 tan aslam eń tájiriybeli sırt el qánigeleri Nókis qalasına jetip keldi.
«Al-amal» xalıqaralıq xirurgiyalıq toparı bir hápte dawamında Qaraqalpaqstan Respublikasında boladı.

Usı tiykarda Aralboyı regionında jaylasqan rayon hám qalalarda sociallıq qorǵaw reestrine kirgizilgen, sonıń ishinde, joqarı texnologiyalıq xirurgiyalıq ámeliyat ótkeriwge mútáj 300 ge shamalas balalar, hayal-qızlar hám er adamlar salamatlıǵı bekkemlenedi.

Atap aytqanda, bul jerde medicinanıń onlaǵan baǵdarı boyınsha qayırqomlıq túrinde orınlanatuǵın operaciyalar Respublikalıq qıstawlı járdem ilimiy orayı, Respublikalıq qánigelestirilgen Kardiologiya, Onkologiya hám radiologiya jáne Kóz mikroxirurgiyası oraylarınıń regionallıq filialları, sonday-aq, Respublikalıq kóp tarmaqlı eresekler hám balalar medicina oraylarında ótkeriliwi belgilengen.

Bunıń ushın belgilengen mánzillerdegi medicina mákemelerinde zárúr sharayatlar jaratılǵan.