Ózbekstan Respublikası Prezidenti Shavkat Mirziyoev aymaqlardıń rawajlanıwı hám xalıqtıń turmısı menen jaqınnan tanısıw, jańa perspektivalı rejelerdi belgilew maqsetinde 1-may kúni Xorezm wálayatına keldi.

Bul úlke áyyemgi tariyxı hám mádeniyatı menen turizm tartımlılıǵına iye. Házirgi ekonomikalıq rawajlanıw sebepli isbilermenlik saparları da kóbeymekte. Biraq Úrgensh xalıqaralıq aeroportı xalıq hám miymanlardıń talabına tolıq juwap bermey atır. Ol saatına tek ǵana 400 jolawshıǵa xızmet kórsete aladı. Bul qatnawlardı kóbeytiw imkaniyatın bermey atır. Sonıń ushın aeroporttı modernizaciyalaw hám basqarıwǵa beriw názerde tutılǵan.
Sapar waqtında mámleketimiz basshısına usı joybardıń barısı haqqında málimleme berildi.
Bul baǵdarda 2024-jılı 1-avgustta járiyalanǵan ashıq tender eki basqıshta ótkerilip, onda Franciya, Koreya, Túrkiya, Qatar sıyaqlı mámleketlerden segiz kompaniya qatnastı. Juwmaǵında uyımlararalıq tender komissiyasınıń qararı menen Koreya Respublikasınıń Incheon International Airport Corporation kompaniyası jeńimpaz dep tabıldı.
Prezidentimiz usı kompaniya hám joybar basshıları menen sáwbetlesti.
Kompaniya prezidenti Inchon xalıqaralıq aeroportı sıyımlılıǵı boyınsha dúnyada úshinshi orında turatuǵının, servis boyınsha jetekshilerden biri ekenin ayttı. Úrgensh kompaniyanıń ekinshi aeroportı bolatuǵının atap ótip, onı jańalaw hám basqarıw rejelerin málim etti.
Mámleketimiz basshısı bunday aldınǵı kompaniya menen sheriklikten quwanıshlı ekenin atap ótip, óz-ara paydalı birge islesiwdi keńeytiw boyınsha pikirlerin bildirdi.
– Xorezmde kóplegen zamanagóy miymanxanalar, dem alıw hám sawda orayların qurıp atırmız. Keleshekte turistler aǵımın 5 millionǵa jetkeriwdi maqset etkenbiz. Onı aeroport penen úylestirsek, óz-ara paydalı boladı, dáramat kóbeyedi, – dedi Shavkat Mirziyoev.
Sırt el aviakompaniyaları menen birgelikte samolyotlar alıp kelip, tasıwlardı kóbeytiw boyınsha pikir alısıldı. Bul sheriklikten paydalanıp, servis boyınsha Koreya tájiriybesin úyreniw, qánigelerimizdi oqıtıw hám mamanlıǵın arttırıw zárúr ekenligi atap ótildi.
Joybardıń ulıwma bahası 223 million AQSh dolları bolıp, onıń sheńberinde jańa ushıw-qonıw jolı, jolawshı hám júk terminalların qurıw, “ICAO” talaplarına juwap beretuǵın jaqtılandırıw-signal qurılmaların ornatıw, arnawlı texnikalar satıp alıw názerde tutılǵan.
Qurılıs-rekonstrukciya jumısları 2025-2027-jıllar dawamında ámelge asırıladı. Bulardıń nátiyjesinde aeroport Boeing 747 hám Airbus 350 sıyaqlı iri hawa kemelerin qabıl etiw imkaniyatına iye boladı. Aerovokzaldıń ulıwma maydanı 39 mıń kvadrat metrge jetip, saatına 1 mıń 300 jolawshıǵa xızmet kórsetiw quwatlılıǵı jaratıladı.
Ulıwma, bunday zamanagóy infrastruktura arqalı Úrgensh aeroportı eń qolaylı jónelislerden birine aylanadı. Xorezmniń sırt elli turistler ushın tartımlılıǵın arttırıwǵa hám elimizdiń aviaciya tarawın rawajlandırıwǵa úles qosadı.
Bolajaq jańa terminal joybarı da tanıstırıldı. Prezidentimiz onıń ishki hám sırtqı kelbetinde milliy ruwxtı sáwlelendiriw boyınsha usınıslar berdi.
Bul jerde mámleketimiz basshısı jurnalistler menen de sóylesti. Xorezmge sapar etiwden maqset jańa sheklerdi belgilep, ekonomikalıq kórsetkishlerdi jáne de arttırıw, wálayatta jasap atırǵan 2 millionnan aslam xalıqtıń sharayatın jaqsılaw, jumıs orınların ashıp, adamlardıń dáramatın kóbeytiw ekeni atap ótildi.
Prezident Shavkat Mirziyoev Al-Xorezmiy qalashasınıń qurılısın kózden ótkerdi.
Mámleketimiz basshısı 2022-jılı avgustta usı qalashanıń tırnaǵın qoyǵan edi. Ótken jılları injenerlik tarmaqları tartılıp, 1 mıń 773 kvartiralı 72 kóp qabatlı jay paydalanıwǵa tapsırılǵan. Bıyıl mıń kvartiralı jáne 28 turaq jaydıń qurılısı rejelestirilgen. Bul jerde jámi 5 mıńnan aslam kvartira boladı.
Qalasha Úrgensh xalıqaralıq aeroportı janında, 130 gektardan aslam aymaqta qurılmaqta. Samolyottan túsken miymanlardıń kóz aldında eń dáslep mine usı gózzal orın payda boladı. Qalashanıń orayında Xorezmiy babamızdıń sawlatlı esteligi ornatıladı.
Prezidentimizge bul esteliktiń joybarı tanıstırıldı.
Estelik qalashada qurılıp atırǵan 20 gektarlıq baǵdıń kiriw bóliminde ornatıladı. Onıń biyikligi 22 metr, tırnaǵı menen birge 30 metrden aslam boladı.
Juwapkerlerge monumentti hám dóretiwshilik, hám mánilik jaqtan jetilistiriw, qalashada jasıl toǵaydı kóbeytiw boyınsha kórsetpeler berildi.
Kúni keshe Prezidentimiz Al-Xorezmiy universitetin hám qánigelestirilgen mektep shólkemlestiriw boyınsha qararǵa qol qoydı. Bul universitette 3: matematika hám informatika, aerokosmoslıq texnologiyalar injenerligi hám jasalma intellekt fakultetleri boladı. Oqıw processleri “Jańa Ózbekstan” universitetiniń tájiriybesi tiykarında, Birlesken Arab Ámirlikleri, Qıtay, Ullı Britaniya sıyaqlı mámleketlerdiń abıraylı joqarı bilimlendiriw shólkemleri menen birgelikte shólkemlestiriledi. Qabıllawdı 2025-2026-oqıw jılınan baslaw rejelestirilgen. Jámi studentler sanı 4-6 mıń átirapında bolıwı názerde tutılǵan.
Qalasha aymaǵında Tashkenttegi Muhammed al-Xorezmiy mektebiniń filialı da shólkemlestiriledi. Oǵan 4-klass pitkeriwshileri tańlap alınadı. Bilimlendiriwdiń juwmaqlawshı 2-jılı injenerlikke baslanǵısh tayarlıqqa qaratıladı.
Sonday-aq, Al-Xorezmiy qalashasında texnopark hám ofisler, medicina hám mádeniyat orayları, qıyabanlar, mektep hám baqshalar, sport kompleksleri, sawda hám turmıslıq imaratlar boladı.
Prezident Shavkat Mirziyoev Xorezm wálayatına saparı sheńberinde Xanqa rayonında qurılǵan mebel qurılısı kishi sanaat zonasın barıp kórdi.
Mámleketimiz basshısınıń 2021-jıl 21-iyundegi mebel sanaatın rawajlandırıwǵa baylanıslı qararına muwapıq, potencialı bar rayonlarda usınday sanaat zonaları shólkemlestirilmekte.
Xanqa rayonında da burınnan mebel soǵıwshı ustalar kóp. Házirgi kúnde bul baǵdarda 140 tan aslam isbilermen, 500 den aslam shańaraqta kishi ustaxanalar bar. Usı waqıtqa shekem olardıń kópshiligi tar jerlerde, qolaysız sharayatlarda isleytuǵın edi.
Sol sebepli 10 gektar jer ajıratılıp, mebel ónimlerin klaster usılında islep shıǵarıw, kórgizbe hám sawda obektlerin óz ishine alǵan kishi sanaat zonası qurıldı. Bul jerde 10 million dollarlıq 61 kárxana jumıs baslamaqta. 650 adam jumıs penen támiyinlendi.
Kárxanalarda Germaniya, Italiya, Shveycariya, Túrkiya, Qıtay sıyaqlı mámleketlerden keltirilgen zamanagóy ásbap-úskeneler ornatılǵan. Jılına 108 milliard sumlıq turaq jay, ofis, miymanxana, restoran, sawda hám sociallıq mákemeler ushın mebeller islep shıǵarıw quwatlılıǵı jaratılǵan.
Prezidentimiz ustaxanalardaǵı jumıs procesin kózden ótkerdi. Xorezm wálayatında qurılıs kólemi artqanı, kóplegen turaq jaylar, miymanxanalar, imarat hám obektler qurılıp atırǵanınan nátiyjeli paydalanıp, kárxanalar ushın buyırtpalar qáliplestiriw, jańa túrdegi ónimlerdi lokalizaciyalaw zárúrligin atap ótti.
Mebel qurılısı kishi sanaat zonasında dizayner hám texnologlar tayarlaw boyınsha oqıw orayı shólkemlestirilgen. Oǵan Túrkiyadan tájiriybeli qánigeler tartılǵan.
Olar menen sóylesiwde mebellerdiń sapasın támiyinlew, jaslardıń bul boyınsha tájiriybesin arttırıw haqqında sóz boldı.
Bul jerde islep shıǵarılıp atırǵan ónimler sırtqı bazarlarǵa da qaratılıwı názerde tutılǵan. 3 million dollardan aslam eksport etiliwi mólsherlengen.
Jáne bir áhmiyetli tárepi, sanaat zonasında energiya nátiyjeliligine itibar qaratılǵan. Kárxanalardıń barlıǵına quyash panelleri ornatılǵan.
Mámleketimiz basshısı shourumda ónim úlgilerin kózden ótkerdi, olardıń sapasın hám dizaynın joqarı bahaladı.
Xorezm wálayatında mebel islep shıǵarıw menen 300 den aslam kárxana shuǵıllanadı. Tarawdaǵı jeke tártiptegi isbilermenler 200 den aslam, 1 mıń 300 den aslam xalıq ózin-ózi bánt etken.
Prezident Shavkat Mirziyoev Xanqa rayonındaǵı “Sobirjon Yusuf” shańaraqlıq fermer xojalıǵınıń atızında boldı.
Onıń basshısı Ayımjan Atajanova 73 jasta. Qolı gúl bul hayal nálshilik penen shuǵıllanıp atırǵanına qırq jıldan asqan. Xojalıqtıń 3 gektar maydanında miyweli hám sayamanlı terek nálleri jetistiriledi. Jáne eki gektarda bolsa baǵshılıq etiledi. Bunnan tısqarı, 12 sotix ıssıxanada 40 túrdegi gúl nálleri jetistiriledi. Íssıxana zamanagóy suwdı únemleytuǵın texnologiyalar menen támiyinlengen bolıp, onıń hár bir bóliminde nállerdiń túri hám ózgesheliginen kelip shıǵıp zárúr mikroklimat jaratılǵan.
Ǵayratlı ana shańaraq aǵzaların da usı jumısqa baslaǵan. Jılına 50 mıń túpten aslam nál jetistirip, satıladı. Olardıń jıllıq dáramatı bir milliard sumnan asadı.
Itibarlı tárepi, bul jerde jetistirilip atırǵan náller qońsı aymaqlar, Qazaqstan hám Túrkmenstanǵa da jetkerip berilmekte.
Baǵ jaylasqan Gúlistan máhállesinde 7 mıńnan aslam xalıq jasaydı. Jaslar hám hayal-qızlarǵa órnek bolıp, olardı jumıs penen támiyinlewde ananıń xızmetleri úlken. Ol házirgi waqıtqa shekem 200 den aslam shákirt jetistirip, 300 jumıssız puqaranı nálshilikke úyretken. Máhálledegi 70 procent shańaraq penen jumıstı úyge alıp islew jolǵa qoyılǵan.
Pidayı diyqan bıyıl rayondaǵı barlıq mektep hám baqshalarǵa 2 mıń qaraǵay nálin biyǵárez tarqatıp, “Jasıl mákan” joybarına, elimizdiń abadanlıǵına úles qostı.
Bántlik ministrligi hám bank penen birgelikte xojalıqtıń tutas aymaǵında oqıw orayı ashılǵan. Onda xojalıq tájiriybesi tiykarında úylerdegi nátiyjesiz qıytaq jerden jıl dawamında dáramat alıwǵa úyretilmekte. Nátiyjede máhállelerde isbilermenlik keńeyip, shańaraqlarǵa qosımsha dáramat kirip kelmekte.
Bul xızmetleri, miynet súygishligi hám jas áwladqa úlgi bolıp atırǵanın esapqa alıp, Prezidentimiz Ayımjan Atajanovanı “Ózbekstanda xızmet kórsetken awıl xojalıǵı xızmetkeri” ataǵı menen sıylıqlawǵa qarar etti.
Xalıqtıń belsendiligi artıp, turizm jedel rawajlanıp atırǵan Xorezmde transport xızmetleri de jaqsılanbaqta. Usı maqsette “Bunyod ywlovchi tashish” kárxanası tárepinen derlik 8 million dollar esabınan 80 zamanagóy avtobus alıp kelinbekte. Házirge shekem sonnan 50 i alıp kelingen.
Mámleketimiz basshısı wálayatqa saparı waqtında xalıqqa jaratılıp atırǵan qolaylıqlar menen tanıstı.
“EVRO-5” talaplarına juwap beretuǵın bul avtobuslardıń sıyımlılıǵı 70 adamlıq. AStı tómen bolǵanı ushın mayıplar hám kekseler ushın da qolaylı. Sonday-aq, Wi-Fi hám baqlaw kameraları da bar. Bunday zamanagóy jámiyetlik transporttan jası úlken de, jası kishi de birdey razı.
Aldınǵı kishi avtobuslardıń hár biri kúnine 200-300 adamdı tasıytuǵın bolsa, jańa avtobuslardıń hár biri mıń adamǵa xızmet kórsetpekte. Olardıń qatnaw aralıǵı da eki esege qısqarıp, 5-12 minutqa tústi. Nátiyjede Úrgensh qalasında xalıqtıń jámiyetlik transporttan paydalanıw dárejesi 38 procentke jetti.
Tiykarǵısı, bunday sharayatlar transport jetispewshiligi hám kóshelerde tıǵılıstıń aldın alıp, puqaralardıń erkin háreketleniwine xızmet etpekte.
Basqa aymaqlardı da jámiyetlik transport penen jaqsı qamtıp alıw ushın kárxana tárepinen tez arada jáne 30 avtobus alıp keliniwi názerde tutılǵan.
Prezidentimiz jámiyetlik transporttı rayonlar menen nátiyjeli baylanıstırıp, jónelislerdi qolaylastırıw boyınsha kórsetpeler berdi. Jollardı ońlap, aydawshılardıń mamanlıǵın hám texnikalıq xızmet sapasın arttırıw avtobuslardan paydalanıw múddetin sozıwda áhmiyetli faktor ekeni atap ótildi.
Mámleketimiz basshısı elimizde islep shıǵarılıp atırǵan vagonlar hám Úrgensh – Xiywa elektrlestirilgen temir jolın kózden ótkerdi.
Búgingi kúnde 465 kilometrlik “Buxara – Úrgensh – Xiywa” temir jolı elektrlestirilip, qorǵaw tosıqları ornatıldı hám zárúr imaratlar qurıldı. Bul jónelis ushın Qubla Koreyanıń “Hyundai Rotem” kompaniyasınan joqarı tezliktegi 6 elektropoezd satıp alınıp, kelesi jıldan “Jalaladdin Manguberdi” ataması astında Tashkent – Xiywa jónelisine qoyıladı.
Nátiyjede jılına 3 millionnan aslam jolawshıǵa xızmet kórsetiledi. Házirgi waqıtta Tashkentten Xiywaǵa 14 saatta jetip baratuǵın poezd usı jóneliste háreketke qoyılatuǵın elektropoezd imkaniyatları sebepli 7 saat 40 minutta jetip baradı.
Sonday-aq, júk poezdlarınıń ótkeriwsheńligi derlik 6 million tonnaǵa jetedi. Házir bul kórsetkish 1 million tonna.
Prezidentimizdiń 2023-jıl 10-oktyabrdegi temir jol transportı tarawın túp-tiykarınan reformalaw haqqındaǵı qararı tiykarında vagon qurılısı tarmaǵı da bekkemlenbekte. Sonıń ishinde, Tikleniw hám rawajlanıw qorınan 50 million dollar jolawshı vagonların islep shıǵarıw ushın qaratılǵan. Usı jıldıń birinshi shereginde dáslepki 10 jolawshı vagonı qurıp pitkerildi.
Mámleketimiz basshısı olardaǵı qolaylıqlardı kózden ótkerdi.
Kelesi eki jılda jolawshı vagonlarınıń sanı 70 ke kóbeytilip, eski túrdegilerinen basqıshpa-basqısh waz keshiledi. Nátiyjede jılına bir millionnan aslam qosımsha jolawshını tasıw imkaniyatı jaratıladı.
Prezident usı jańa poezdda jámiyetshilik penen birge Úrgenshten Xiywaǵa jol aldı. Jol boyındaǵı orınlardaǵı abadanlastırıw, atız shetlerinde egilgen nállerdi baqlap bardı.
Wálayatta ótken jılı “Jasıl mákan” ulıwma milliy joybarı sheńberinde derlik 10 million túp terek hám puta nálleri egilgen. Iri sanaat kárxanaları tárepinen “jasıl belbew”ler qurılǵan.
Bıyıl erte báhárde de diyqanshılıq kólemi keńeydi. Wálayattaǵı 1 mıń 100 gektardan aslam atız shetleri hám kanallar átirapındaǵı maydanlarǵa dáramatlı ónimler egildi. Olardı kepillikli satıp alıwǵa isbilermenler biriktirilgen. “Agroko‘makchi” mobil qosımshası arqalı atız shetleri haqqındaǵı maǵlıwmatlar jámiyetshilikke jetkerilmekte.
Xorezm wálayatınıń turizm potencialın júzege shıǵarıw boyınsha islenip atırǵan jumıslar úlken nátiyje bermekte. Bunı aymaqqa sırt elli turistlerdiń keliwi jeti-segiz jıl aldınǵı dáwirge salıstırǵanda 30 esege kóbeygeninde de kóriw múmkin. Tarawdaǵı ózgerisler esabınan wálayattıń turizm xızmetleriniń eksportı 2017-jıldaǵı 7 million dollardan ótken jılı 380 million dollarǵa jetti.
Sır emes, aldın aymaq turizmi haqqında sóz etilgende kópshilik tek ǵana Ishan qalanı kóz aldına keltiretuǵın edi. Keyingi waqıtları bul baǵdardaǵı kózqaraslar pútkilley ózgerdi. Turistler ushın qırqtan aslam turistlik baǵdarlar islep shıǵıldı hám olardıń ulıwma sanı júzge jetti.
Endi bul jerde jáne bir biybaha kompleks – “Arda Xiywa” bar. Onıń ashılıwı Xorezm wálayatına Prezident saparınıń áhmiyetli waqıyası boldı.
Kompleks eski kent ishinde jáne bir biytákirar qalanı esletedi. Bul jeo ózinde tariyx hám búgindi úylestirgen arxitekturalıq sheshimi menen biybaha joybar bolıp esaplanadı.
“Arda Xiywa” aymaqtaǵı 25 gektarlıq tómen ónimdarlı, shorlı maydanda qurıldı. Onıń bir tárepi 150 gektarlıq Ǵawıq kólge tutasıp ketkeni, bul maydanlarda jasıl aymaqlar shólkemlestirilip atırǵanı joybardı turistler ushın jáne de tartımlı kórsetiwge xızmet etedi.
Mámleketimiz basshısı kompleks boylap júrip, dóretiwshilik jumısların kózden ótkerdi. Ónermentshilik, kórkem hám ámeliy kórkem óner kórgizbelerin jáne bazardaǵı sawda orınların tamashaladı.
Bul jerde turistlerge xızmet kórsetiw ushın barlıq qolaylıqlar jaratılǵan. Atap aytqanda, áyyemgi qala ortalıǵın sáwlelendiretuǵın imaratlar, jámi mıń orınlıq 20 miymanxana qurıldı. Ashıq-jabıq akvapark hám attrakcionlar, úsh mıń orınlıq amfiteatr hám muzıkalı fontan qurıldı.
Sonday-aq, tariyxıy kórinistegi 11 ónermentler úyi, shıǵıs bazarı, “Góne Úrgensh” muzeyi miymanlar ushın qızıq boladı. Eki kilometrlik kanalda qayıqta seyil etiw imkaniyatı jáne bir ózine tán jańalıq.
Bes kinoteatr hám koncert zalı, kóplegen restoranlar, zergerlik orayı, sawda dúkanları hám orınları, suw moto-turizmi ornı jáne avtomobil turatuǵın orın zamanagóy talaplarǵa sáykes túrde qurılǵan. Aymaqtaǵı barlıq imaratlar ushın birden-bir suwıtıw hám ısıtıw sisteması qurılǵan. Elektr energiyasın támiyinlew ushın quyash panelleri ornatılǵan.
Kompleks jılına úsh million adamdı qabıl etiw imkaniyatına iye. Bul jerde eki mıńnan aslam adam jumıs penen támiyinlenedi.
“Iyshan qala” tariyxıy bolsa, “Arda Xiywa” Xorezmniń zamanagóy “mirát qaǵazı” boladı.
Mámleketimiz basshısı bul jerde xorezmli jaslar menen qızǵın sóylesti.
– Hár qanday rezerv, jer astı baylıqları qashanlardur tawsıladı. Biraq babalarımız bizge sonday ullı ruwxıy miyras, ullı estelikler qaldırǵan, olar ásirler dawamında xalıqqa xızmet etip kelmekte. Biz mine, usı baylıqtan elimizdiń mápi jolında paydalanıwımız kerek. Ádewir jumıslar islendi, biraq ele rejeler de kóp. Men bul jolda siz, jaslarǵa isenemen. Sizler biyik shıńlardı gózlep, soǵan jarasa bilim alsańız, zamanagóy kásiplerdiń sheberi bolsańız, joqarı maqsetlerimizge, álbette, erisemiz, – dedi Shavkat Mirziyoev.
Jaslardıń oqıwdaǵı tabısları, arzıw-niyetleri haqqında pikir alısıldı.
Xiywa qalasında “Arda Xiywa” xalıqaralıq turizm orayınıń saltanatlı ashılıw máresimi boldı. Prezident Shavkat Mirziyoev máresimdegi shıǵıp sóylegen sózinde wálayattıń ullı ótmishi hám búgingi turizm potencialı haqqında ayttı.
– Xorezm dúnya civilizaciyası hám mádeniyatına biybaha úles qosqan Shıǵıs gáwharı bolıp esaplanadı. Bul áyyemgi jurt dúnyaǵa dańqı shıqqan qanshadan-qansha ilimpazlar, sárkarda hám sultanlar, áziz danıshpanlar, biytákirar shayır hám jırshılardıń watanı, – dep atap ótti mámleketimiz basshısı.
Bul jerdegi sawlatlı tariyxıy estelikler biybaha baylıq ekeni atap ótildi. Ashıq aspan astındaǵı qala-muzey – “Iyshan qala” kompleksi ulıwmainsanıylıq ǵáziynesi sıpatında YuNESKO dizimine kirgizilgen. Wálayatta 260 tan aslam mádeniy miyras obekti bar. Olar óziniń biybaha hám gózzal arxitekturalıq kelbeti menen tek ǵana Ózbekstannıń emes, al pútkil Oraylıq Aziyanıń dúnyanıń rawajlanıwındaǵı biytákirar ornın belgilep beretuǵın janlı tariyx bolıp esaplanadı.
Búgingi kúnde usıǵan tiykarlanıp, turizmdi rawajlandırıwǵa ayrıqsha strategiyalıq baǵdar sıpatında itibar qaratılmaqta. Tariyxıy estelikler, mádeniy miyras obektleri qásterlep-saqlanıp, global turizm tarmaǵına jedel tartılmaqta.
Sonıń menen birge, ózinde tariyx hám zamanagóylikti jámlegen iri turistlik kompleksler de qurılmaqta. “Arda Xiywa” usınday úlken rejelerdiń jáne bir ámeliy nátiyjesi bolıp esaplanadı. Bul sawlatlı xalıqaralıq turistlik orayda 17 miymanxana hám miyman úyleri, 9 restoran, ashıq hám jabıq akvaparkler, 3 mıń orınlıq amfiteatr, 5 kino hám koncert zalı, kórgizbeler pavilonı, 70 dúkan, 300 sawda ornı, 11 ónermentler úyi, Shıǵıs bazarı hám zergerlik orayı, fontanlar, jaǵalıq boyı jolı bar.
Bunday jumıslardıń esabınan wálayatqa turistlerdiń aǵımı qosımsha túrde 1 millionǵa artadı, xızmetler 1,2 trillion sumǵa kóbeyedi, keminde 2 mıń jumıs ornı jaratıladı.
– “Arda Xiywa” Xorezmde turizmniń rawajlanıwında jańa bet ashatuǵınına, wálayattıń ekinshi “mirát qaǵazı”na aylanatuǵınına isenemen. Bul biytákirar orın Xorezmge, pútkil xalqımızǵa múbárek bolsın, – dedi Prezidentimiz.
Jáne bir jańalıq – endi Xiywa rayonınan 2 mıń 400 gektar jer Xiywa qalasına ótkerilip, ol jerde “Sahra juldızı” turistlik kompleksi qurıladı. Onda miymanxanalar, kewilashar oraylar, gastronomiyalıq hám sawda kósheleri, muzeyler, eko úyler, jazǵı lager, ekstremal turizm orınları boladı.
Sonday-aq, Topıraqqalada shól aymaǵındaǵı 5 mıń gektar jerde safari hám ań turizmi rawajlandırıladı. Úrgensh qalası, Shavat, Qwshkópir, Xiywa hám Xazarasptan aǵıp ótetuǵın Ǵazavot, Palwan, Shavat kanallarınıń boylarında 50 million dollarlıq 80 xızmet kórsetiw, sawda-kewilashar obektleri iske qosıladı. Baǵat, Gúrlen, Yangibazar hám Úrgensh rayonında turizm awılları shólkemlestiriledi.
Mamun akademiyası imaratı aldındaǵı 2 gektar baǵ “Ullı oyshıllar” atamasındaǵı ashıq aspan astındaǵı “smart” muzeyge aylandırıladı. Usı tiykarda Xorezm jerinde kamalǵa kelgen onlaǵan ata-babalarımızdıń ibratlı ómir jolı, bay dóretiwshilik miyrası interaktiv usılda bir neshe shet tillerde turistlerge usınıladı.
Mámleketimiz basshısı Ámiwdáryanıń eki jaǵasında jaylasqan Xorezm hám Qaraqalpaqstan elin Alla taalanıń ózi táǵdirles etip jaratqanın atap ótti. Sonlıqtan Xorezmde turizmdi rawajlandırıw Qaraqalpaqstan menen úylesikli halda, birden-bir koncepciya tiykarında ámelge asırıladı. Bunıń ushın “Xorezm – Qaraqalpaqstan” turizm aylanbası joybarı islep shıǵıladı. “Úrgensh – Gúrlen – Mańǵıt” avtomobil jolı tolıq rekonstrukciyalanadı.
Sońǵı jılları Xiywa qalasına temir jol tartılıp, jańa vokzal qurıldı, “Buxara – Úrgensh – Xiywa” temir jolı tolıq elektrlestirildi. 2026-jılı bul jónelis boylap Jalaladdin Manguberdi atı menen atalatuǵın zamanagóy tezjúrer poezdlar qatnawı jolǵa qoyıladı. Jaqın keleshekte bul tezjúrer poezdlar Nókiske shekem baradı.
Prezidentimiz máresimde qatnasıp atırǵan sırt elli miymanlardı da qutlıqlap, birge islesiwshi ellerge húrmet hám jaqsı tileklerin bildirdi.
– Búgin dúnyadaǵı qıyın jaǵdayǵa qaramastan, Ózbekstan óz jolınan isenimli barmaqta. Xalqımız tınıshlıq hám abadanlıq, doslıq hám birge islesiw, dóretiwshilik ruwxı menen jasamaqta. Biziń hár bir maqset-rejemiz, hár bir reformalarımız adamlarımızdıń turmısın jaqsılawǵa, olardı razı etiwge qaratılǵan hám bul islerimiz, inshaalla, dawamlı bolsın. Siz, ázizler menen pidákerlik penen miynet etip, Xorezm hám Qaraqalpaqstandı dúnyadaǵı eń gózzal hám abat, ilim hám innovaciyalar, mádeniyat hám kórkem óner jáne de rawajlanǵan jerge aylandıratuǵınımızǵa isenemen, – dedi Shavkat Mirziyoev.
Máresim úlken koncert tamashası menen juwmaqlandı.

Ziyodulla JONIBEKOV, ÓzA
Ikrom AVVALBOEV, ÓzA
Axmedjan ShOKIROV, ÓzA
ÓzAnıń arnawlı xabarshıları