Joqarǵı Keńes Baslıǵı Bozataw rayonındaǵı máhállelerde puqaralar turmısın jaqsılaw boyınsha alıp barılıp atırǵan jumıslar menen tanıstı

Dáslep, Toǵay xojalıǵı jer maydanları kózden ótkerildi. «Jasıl mákan» ulıwma milliy joybarı sheńberinde terek egiw hám jasıl belbawlardı payda etiwde pitomniklerdiń ornı ayrıqsha ekenligi atap ótilip, nál tayarlaw jumısların keńeytiw boyınsha tapsırmalar berildi.

Bunnan soń Joqarǵı Keńes Baslıǵı «Qusxanataw» APJ aymaǵındaǵı 1 kontur 1 ónim baǵdarlaması sheńberinde shańaraqlardı kambaǵallıqtan shıǵarıw maqsetinde shólkemlestirgen kooperaciya tárepinen jolǵa qoyılǵan kartoshka hám másh ónimlerin jetistiriw jumısları menen tanıstı.

Qıytaq jerlerinen mol ónim alıp atırǵan «Bozataw» PPJ aymaǵı turǵınları Jangeldiev Qalmambet, Baymuratov Saǵındıq hám Jumanazarov Júginistiń jer maydanları hám ıssıxanaları kózden ótkerilip, olardıń jumısları kópshilikke úlgi bolıwı kerek ekenligi atap ótildi. 

Erkindárya kanalındaǵı jaramsız jaǵdayǵa kelip qalǵan piyadalar ótiw ushın arnalǵan kópir boyınsha mashqalanı saplastırıw hám puqaralar ushın qáwipsiz kópir qurıp beriw, «Zarbdor» tájiriybesi tiykarında kanal boyı xızmetin shólkemlestiriw boyınsha juwapkerlerge tapsırmalar berildi. 

Joqarǵı Keńes Baslıǵı rayon orayında jaylasqan Sport mektebinde jaratılǵan sharayatlar menen tanısıp, sportshı jaslar menen de ushırastı. Olar menen jaqınnan pikirlesti. 

Rayondı kózden ótkeriw dawamında «Bozataw» PPJ aymaǵındaǵı jańadan qurılıp atırǵan 5 qabatlı turaq jay qurılısı, bos turǵan imaratta jańadan jumıs baslaǵan jas isbilermenler tárepinen iske qosılǵan mebel islep shıǵarıw joybarı menen tanıstı. Bazar aymaǵında xalıqqa hám satıwshılarǵa qolaylı sharayat jaratıw boyınsha anıq tapsırmalar berildi.