Joqarǵı Keńes Baslıǵı Kegeylide xalıqtıń abadan turmısın támiyinlew baǵdarında ámelge asırılıp atırǵan jumıslardı barıp kórdi
Qaraqalpaqstan Respublikası Joqarǵı Keńesiniń Baslıǵı Amanbay Orınbaev Kegeyli rayonında xalıqtıń abadan turmısın támiyinlew, puqaralardıń dáramat alıwına kómeklesiw baǵdarında ámelge asırılıp atırǵan jumıslar menen tanısıw maqsetinde rayonda boldı.
Dáslep, Joqarǵı Kenes Baslıǵı rayondaǵı pillekeshler tárepinen pille tárbiyası boyınsha alıp barılıp atırǵan jumıslar menen tanıstı. 
Bunnan soń Abadanlastırıw basqarması maydanlarında dekorativ hám miyweli terek nállerin jetistiriw boyınsha jumıslar kórip shıǵıldı. Kemshilikler atap ótilip, pitomnikler jumısların nátiyjeli shólkemlestiriw boyınsha tapsırmalar berildi.
Rayonda «LANKO MIYA» qospa kárxanası tárepinen jańadan iri kólemli mebel ushın arnawlı ónimler islep shıǵarıw joybarı ámelge asırılıp atırǵan bolıp, kárxana jumısları kózden ótkerildi. Jumıslardı jedellestiriw boyınsha ushırasıp atırǵan mashqalalar tıńlanıp, sol orınnıń ózinde unamlı sheshim tabıw boyınsha juwapkerlerge anıq tapsırmalar berildi.
Kegeyli rayonı «Aqtuba» awıl puqaralar jıyını aymaǵında boy tiklegen «Jańa Ózbekstan» massivi aymaǵında qurılıp atırǵan kóp qabatlı imaratlar quılısı barısı da kózden ótkerildi. Juwapkerlerge qurılıs jumısların jedellestiriw, sonday-aq, sapalı etip isleniwin támiyinlew boyınsha tapsırma berildi.
Joqarǵı Keńes Baslıǵı «Nurlı bostan» MPJ aymaǵında isbilermenlik subektleriniń jumısları menen de jaqınnan tanıstı. Atap aytqanda, turmıslıq xızmet kórsetiw orayı, «Kegeyli mebel» JShJniń mebel islep shıǵarıw ornı, «Milliy kiyimler» sawda ornınıń tigiw cexları kózden ótkerilip, isbilermenler barqulla qollap-kuwatlanatuǵınlıǵı atap ótildi. 
«Jılwan jap» MPJ aymaǵında úy aldı qıytaq jerinen nátiyjeli paydalanıp atırǵan Rima Bazarbaevanıń ıssıxanasındaǵı jumısları barıp kórildi. Onıń azǵana jerden mol ónim alıwǵa qaratılǵan baslaması kópshilikke úlgi bolıwı kerek ekenligi atap ótilip, qosımsha ıssıxanasın keńeytiwi ushın 10 mln. sum qarjı ajıratıw boyınsha juwapkerlerge tapsırma berildi.