Respublika jumısshı toparı tárepinen Nókis qalasında kóshpeli qabıllaw ótkerildi

Búgingi kúnde mámleketimizde insan mápleri joqarı qádiriyat dárejesine kóterilgen bolıp, bunda barlıq ilajlar «Insan qádiri ushın», al, iygilikli ámeller bolsa «Insan mápleri hámme nárseden ústem»-degen princip tiykarında turmısta óz sáwleleniwin tawıp atır. Bunda puqaralardıń mashqalaların úyreniw hám saplastırıw, nızamlı máplerin támiyinlew jolında barlıq ilajlar kórilmekte.

Sonı ayrıqsha aytıw kerek, usı jıldıń 6-10-may kúnleri respublikalıq Jumısshı topar tárepinen puqaralardıń múrájatları hám xalıqtı qıynap kiyatırǵan mashqalalarına sheshim tabıw boyınsha orınlarda kóshpeli qabıllawlar ótkeriliwi belgilengen edi. Usı tiykarda Nókis qalasındaǵı «Mono oray» imaratında Xojeli, Nókis, Taqıyatas rayonları hámde Nókis qalası puqaralarınıń múrájatları kórip shıǵıldı.

Ótkerilgen qabıllawda da mine usı baǵdarda puqaralardıń tilek-ótinishleri, olardı qıynap atırǵan mashqalaları tıńlandı. 

Onda óziniń mashqalaları menen 450 ge jaqın puqara kelgen bolıp, 476 másele boyınsha múrájat etti. Sonnan, 146 múrájat yaǵnıy, ulıwma 31 payızı sol orınnıń ózinde sheship berildi.  

Sud-huqıq, salıq, avtomobil jolları, bántlik sıyaqlı 123 máselege tiykarlı túsinikler berilgen bolsa, múddet talap etetuǵın 207 múrájat qadaǵalawǵa alındı hám qısqa múddette orınlı sheshim tabıw boyınsha juwapkerlerge tapsırmalar berildi.