Joqarǵı Keńes Baslıǵı Shımbay rayonında kóshe biyleri menen ushırastı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev puqaralardıń turmıs sharayatın jaqsılaw baǵdarında ele de sheshimin kútip turǵan máselelerdi anıqlaw hám mashqalalarǵa sheshim tabıw boyınsha Shımbay rayonındaǵı kóshe biyleri, nuranıy-aqsaqallar menen ushırastı.

Onda dáslep Joqarǵı Keńes Baslıǵı húrmetli Prezidentimiz basshılıǵında elimizde ámelge asırılıp atırǵan reformalar, keń kólemli qurılıs-ońlaw hám abadanlastırıw jumısları haqqında atap ótti. 

Sonday-aq, Prezidentimizdiń «Respublika aymaqların jedel kompleksli rawajlandırıw ushın tańlap alınǵan rayon (qala) larda ámeliy ilajlardı ámelge asırıw haqqında»ǵı 132-sanlı qararı  qabıl etilip, usı tiykarda Shımbay rayonın 2025-2026-jıllarda jedel kompleksli rawajlandırıw baǵdarlaması sheńberinde ámelge asırılıwı tiyis jumıslar, belgilengen wazıypalar haqqında keń túrde túsinik berildi.

Óz náwbetinde, kóshe biyleri mámleketimizde alıp barılıp atırǵan iygilikli ámeller, ásirese, Qaraqalpaqstanǵa, sonıń ishinde, Shımbayǵa qaratılıp atırǵan itibardan minnetdar ekenligin ayrıqsha tilge aldı. 

Sonıń menen birge, máhállelerdi abat etiw, infrastrukturalıq mashqalalardı sheshiw hám xalqımızǵa múnásip turmıs sharayatın jaratıw baǵdarında ele de isleniwi tiyis bir qatar áhmiyetli máselelerdi kóterdi.

Joqarǵı Keńes Baslıǵı bul mashqalalarǵa aldaǵı waqıtta, álbette, sheshim tabılatuǵınlıǵın hám ózi jeke qadaǵalawına alatuǵının bildirdi.