Shımbay rayonın abadanlastırıw hám sociallıq-ekonomikalıq jaqtan rawajlandırıw máseleleri keń túrde talqılandı
Qaraqalpaqstan Respublikası Joqarǵı Keńesiniń Baslıǵı Amanbay Orınbaev Shımbay rayonında respublikalıq mákeme-shólkemler, rayon belsendileri qatnasıwında májilis ótkerdi.
Májiliste dáslep, húrmetli Prezidentimizdiń PQ-132-sanlı qararı menen Shımbay rayonın 2025-2026-jıllarda jedel kompleksli rawajlandırıw baǵdarlaması sheńberinde ámelge asırıwı tiyis wazıypalar keń túrde sóz etildi.
Bunnan soń rayondı sociallıq-ekonomikalıq jaqtan rawajlandırıw, kámbaǵallıqtı qısqartıw, xalıqtıń bántligin támiyinlew hámde investiciyalıq joybarlardı ámelge asırıw baǵdarındaǵı ámelge asırılıp atırǵan jumıslar, xalıqtıń múnásip turmıs sharayatın támiyinlew, jańa jumıs orınların jaratıw, abadanlastırıw jumısların alıp barıw sıyaqlı belgilengen wazıypalardıń orınlanıwı máseleleri kórip shıǵıldı.
Atap ótiw orınlı, rayondı hár tárepleme rawajlandırıw boyınsha arnawlı baǵdarlama tiykarında bir qatar wazıypalar belgilep berilgen bolıp, mashqalalardı sheshiw maqsetinde húrmetli Prezidentimiz tárepinen barlıq múmkinshilikler jaratıp berilgen. 
Tilekke qarsı, usınshama imkaniyat berilgenligine qaramastan, ayırım orınlarda kemshiliklerge jol qoyılmaqta. Atap aytqanda, máhállelerdegi jumıslardıń ámelde orınlanıwı, berilgen esabatlarda qosıp jazıwlarǵa jol qoyılǵanlıǵı, abadanlastırıw, pukaralardıń bántligin támiyinlew baǵdarında ilajlardıń talap dárejesinde emesligi sınǵa alındı. Juwapkerler eskertilip, ayırımlarına intizamiy jaza sharasın qollaw boyınsha tapsırmalar berildi.