Joqarǵı Keńes Baslıǵı basshılıǵında Shımbay rayonında keń qamtıwlı abadanlastırıw jumısları baslandı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev basshılıǵında Shımbay rayonında keń kólemli abadanlastırıw jumısların alıp barıw boyınsha rayonlıq mákeme-shólkemler, juwapkerler qatnasıwında úlken háreket baslandı. 

Onda jol boylarında hám infrastruktura obektleri átirapında abadanlastırıw jumısların alıp barıw, xalqımızdıń jer menen islesiw mádeniyatın arttırıw hám hár bir shańaraqtıń úy aldındaǵı qıytaq jerinen nátiyjeli paydalanıwına kómeklesiw boyınsha keń túrde atap ótildi.

Átirap-aymaqtıń tazalıǵın saqlaw jumısları, kóshelerdiń kórinislerin jaqsılaw, eń baslısı, «Abatlıq kewilden baslanadı» degen iygilikli ideya tiykarında keń qamtıwlı abadanlastırıw jumısları hár bir aymaqqa, hár bir máhállege kirip barıwı kerek ekenligi ayrıqsha tilge alınıp, wazıypalar bólistirildi.

Bunnan soń, Joqarǵı Keńes Baslıǵı Shımbay rayonı diyqan bazarı aymaǵında jańadan qurılıp atırǵan xalıqqa sapalı bazar xızmetin usınıw baǵdarında barlıq qolaylıqlarǵa iye iri kólemli jabıq sawda kompleksi qurılısı barısı sonday-aq, rayonda alıp barılıp atırǵan jańa qurılıs, rekonstrukciya jumısları menen tanıstı. 

Atap ótiw orınlı, búgingi kúnde obektte qurılıs jumısları dawam etpekte. Jámi 30 mlrd. sumlıq joybar sheńberinde kóp qabatlı sawda ornı imaratı, avtomashinalar turar ornı hám basqa da qolaylıqlar jaratıladı. 

Joqarǵı Keńes Baslıǵı juwapkerlerge sawda kompleksi qurılısı jumısların jedellestiriw hám joybar baslamashılarına kómeklesiw boyınsha tapsırmalardı berdi.