Urıs qatnasıwshılarına hám veteranlardıń halınan xabar alınıp, Prezident sawǵaları tapsırıldı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Eslew hám qádirlew kúni múnásibeti menen Ekinshi jáhán urısı qatnasıwshıları Qadirbay Narmanov hám Mariya Ivanovna sonday-aq, front artında miynet etken Ráwshan Samarkanova, ataqlı mámleketlik hám jámiyetlik ǵayratker, Miynet Qaharmanı Qállibek Kamalovtıń  shańaraǵında bolıp, bayram sawǵaların tapsırdı.

Veteranlar 9-may – Eslew hám qádirlew kúni ulıwmaxalıqlıq bayramı, sonday-aq, Ekinshi jáhán urısında fashizm ústinen erisilgen jeńistiń 80 jıllıǵı menen qızǵın qutlıqlandı hám Ózbekstan Respublikası Prezidentiniń bayram qutlıqlawı oqıp esittirildi.

Sonday-aq, jeńiske úles qosqan qaharmanlar, front artında xızmet etken veteranlar, elimiz rawajlanıwı jolında miyneti sińgen nuranıylardıń iygilikli isleri barqulla eske alınıp, olarǵa húrmet kórsetiletuǵınlıǵı atap ótildi.  

Prezidentimizdiń tapsırması tiykarında Ekinshi jáhán urısı qatnasıwshılarına 10 mıń dollar muǵdarında bir mártelik aqshalay sıylıq, veteranlarǵa da qarjılay sıylıqlar tapsırıldı. Sonday-aq, Prezident sawǵaları, Qaraqalpaqstan Respublikası Joqarǵı Keńesi, Ministrler Keńesi, Arqa-batıs áskeriy okrugi, Nókis qalası hákimligi hám bir qatar shólkemler atınan bahalı sawǵalar tapsırıldı.


Álbette, jawıngerlerimiz hám olar qatarında front artında miynet etken veteranlar, xalqımız iygiligi jolında ayanbay xızmet etken miynet qaharmanlarınıń erlik isleri, úlken isenim hám sabır-taqatı búgingi hám keleshek áwlad ushın ibrat úlgisi bolıp xızmet etedi.