Qádirli watanlaslar!

Búgingi dańqlı sáneni sheksiz quwanısh sonıń menen birge tereń qayǵı-hásiret penen esleymiz. Watan azatlıǵı ushın, házirgi tınısh hám tatıw kúnler ushın sawash maydanlarında amanatın tapsırǵan ata-babalarımızdı, front artında pidayı miynet etken watanlaslarımızdıń muqáddes esteligin yad etip, húrmetimizdi bildiremiz. 

Siz áziz hám dańqlı veteranlarımızdıń teńsiz qaharmanlıqlarıńız pútkil insaniyat tariyxına mángilik óshpeytuǵın, ullı, óz aldına bir bet sıpatında jazılǵanlıǵın tereń minnetdarshılıq penen atap ótemiz. 

Teberik jasqa jetip, búgin aramızda saw-salamat, duwalı bolıp júrgen urıs hám miynet frontınıń barlıq jawıngerlerine jáne bir márte joqarı mehir hám húrmetimizdi inám etip, olardıń barlıǵına shın júrekten raxmet aytamız. 

Turmıstıń awır hám ashshı sınawların mártlershe jeńip ótken Siz, ázizlerdiń elimizdi hár tárepleme rawajlandırıw, jaslardı Watanǵa muxabbat hám sadıqlıq ruwxında, jetik insan etip tárbiyalawǵa qosıp atırǵan múnásip úlesińizdi xalqımız jaqsı biledi.

Sizlerdiń ullı qaharmanlıqlarıńız hám pidayı xızmetlerińiz ushın bárshemiz bas iyip tájim etemiz.

Gúllán xalqımızdı búgingi bayram menen qutlıqlap, bekkem den sawlıq, shańaraǵıńızǵa awızbirshilik, iygilikli hám mashaqatlı jumıslarıńızda tasqın tabıslar tileymiz!

Amanbay Orınbaev
Qaraqalpaqstan Respublikası Joqarǵı Keńesiniń Baslıǵı