Joqarǵı Keńes Baslıǵınıń isbilermenler ushın kóshpeli qabıllawı ótkerildi
Usı jıldıń 11-may kúni Nókis qalasında Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń Nókis qalası, Taqıyatas, Xojeli hám Nókis rayonlarındaǵı isbilermenlerdi qıynap kiyatırǵan mashqalalar hám usınısları boyınsha kóshpeli qabıllawı bolıp ótti.
Dáslep, Joqarǵı Keńes Baslıǵı búgingi kúnde húrmetli Prezidentimiz tárepinen Qaraqalpaqstanda isbilermenlikti rawajlandırıw hám qollap-quwatlaw, investiciyalıq tartımlılıqtı arttırıw boyınsha ayrıqsha qabıl etilgen párman hám qararları tiykarında jaratılǵan imkaniyatlar boyınsha keń túrde atap ótildi. Bunnan soń isbilermenlerdiń múrájatları tıńlandı. 
Qabıllawda isbilermenler tárepinen tiykarınan óz biznesin rawajlandırıw baǵdarında ushırasıp atırǵan mashqalalar, byurokratiyalıq tosıqlar, qarjılandırıw hám kredit ajıratıw máseleleri, kadastr, qurılıs, jer orınların ajıratıw baǵdarlarında múrájatlar bildirildi. Joqarǵı Keńes Baslıǵı tárepinen barlıq mashqalalar dıqqat penen tıńlandı hám bildirilgen múrájatlardıń kópshiligine ornında sheshimin tabıw ilajları kórildi. Waqıt talap etiletuǵın múrájatlar qadaǵalawǵa alınıp, tez pursatta unamlı sheshiw boyınsha tiyisli taraw basshılarına tapsırmalar berildi.
