Qońırat rayonındaǵı jańa kárxanalar jumısları kózden ótkerildi
Qaraqalpaqstan Respublikası Joqarǵı Keńesiniń Baslıǵı Amanbay Orınbaev Qońırat rayonında jańa jumıs orınların jaratıw, investiciyalıq joybarlardı ámelge asırıw, puqaralardıń qosımsha dáramat alıwına kómeklesiw baǵdarında ámelge asırılıp atırǵan jumıslar menen tanıstı.
Dáslep, Joqarǵı Keńes Baslıǵı «Almazar» máhállesi aymaǵında «ULUGBEK KIYET» JShJ tárepinen iske túsirilgen avtomobillerge xızmet kórsetiw orayı jumısı menen tanıstı. 
Atap ótiw kerek, Prezidentimizdiń Qaraqalpaqstan ushın óz aldına qabıl etilgen 129-sanlı pármanı tiykarında jańa xızmet kórsetiw obekti ushın jer maydanı tuwrıdan-tuwrı ajıratıp berilgen. Joybar iske túsiriliwi nátiyjesinde 15 jańa jumıs ornı jaratıldı. 
Joqarǵı Kenes Baslıǵı Prezidentimizdiń 129-sanlı pármanı tiykarında jer maydanı ajıratılıp, jańadan qurılıp atırǵan «Regal Bereket Team» JShJniń sawda orayı, sonday-aq, jeńilletilgen kredit qarjıları tiykarında jańadan iske túsiriliwi belgilengen, qurılısı juwmaqlanıw aldında turǵan mámleketlik emes mektep qurılısı barısı menen tanıstı. Qurılıs jumısların sapalı etip pitkeriw, obektlerdi iske túsiriwde jaqınnan járdem beriw boyınsha juwapkerlerge tapsırmalar berildi. 
Bunnan soń «Qońırat» APJda «YULDASH ALIXAN» JShJ tárepinen 60 jańa jumıs ornın jaratıwǵa qaratılǵan, 1,2 mln. dollar qarjı tiykarında jańadan qurılıp atırǵan duzdı qayta islew zavodı kózden ótkerildi. 
Házirgi waqıtta ónimlerin ishki bazar hám eksportqa baǵdarlap turǵan hám 70 puqaranıń bántligi támiyinlengen «Almazar» MPJdaǵı «TURAN GOLD PROM» JShJniń texnikalıq duz islep shıǵarıwshı kárxanasına Prezidentimizdiń Qaraqalpaqstan ushın qabıl etilgen 213-sanlı pármanı tiykarında 10 mlrd. sum jeńilletilgen kredit ajıratılǵan. 
«BRICH PRODUCT» JShJ tárepinen mebel ushın tayar ónim islep shıǵarıw joybarınıń ulıwma bahası 1 mln. dollar bolıp, búgingi kúnde 50 adam jumıs penen támiyinlengen. Ónimler tiykarınan eksportqa baǵdarlanbaqta. Kárxana óz jumısın ele de keńeytiw maqsetinde bajıxana jeńilliginen paydalanıp kelmekte. 
«Hákim ata» MPJda jasawshı Qudaybergenov Shuxrat tárepinen jeńilletilgen kredit qarjıları tiykarında iske túsirilgen mebel islep shıǵarıw joybarı jumıs baslawı nátiyjesinde qosımsha 6 adamnıń bántligi támiyinlengen.
Joqarǵı Keńes Baslıǵı isbilermenlik subektleri jumısları menen tanıstı. Baslamashılar menen jaqınnan pikirlesti. Olardıń jumısları barqulla qollap-quwatlanatuǵınlıǵın atap ótti. Óz náwbetinde, biznes wákilleri de Qaraqalpaqstanda isbilermenlikti rawajlandırıw boyınsha berilgen jeńillikler ushın Prezidentimizge sheksiz minnetdarshılıǵın bildirdi.